សន្និសិទស្តីពីការសន្យាបរិច្ចាគប្រាក់អន្តរជាតិដើម្បីទប់ទល់នឹងជំងឺកូវីដ ១៩ ទូទាំងពិភពលោកបានធ្វើឡើងតាមអនឡាញកាលពីថ្ងៃទី ៤ ខែឧសភាក្នុងគោលបំណងជំរុញការងារស្រាវជ្រាវវ៉ាក់សាំង ព្យាបាលនិងធ្វើតេស្តជំងឺកូវីដ ១៩ ក្នុងក្របខ័ណ្ឌទូទាំងពិភពលោក។
លោក ឯកអគ្គរដ្ឋទូត ចាងមីង ប្រធានក្រុមប្រេសិតចិនប្រចាំនៅសហភាពអឺរ៉ុបបានថែ្លងសុន្ទរកថាតាមវីដេអូថា ប្រទេសចិនគឺជាសមាជិកមួយដែលមានទំនួលខុសត្រូវរបស់សហគមន៍អន្តរជាតិ ទោះបីជាភារកិច្ចបង្ការនិងគ្រប់គ្រងការរីករាលដាលនៃជំងឺកូវីដ ១៩ របស់ខ្លួននៅតែមានភាពលំបាកក៏ដោយ ប៉ុន្តែនៅតែព្យាយាមអស់ពីសមត្ថភាពដើម្បីផ្តល់ជំនួយដល់បណ្តាប្រទេសដែលមានតម្រូវការ។ប្រទេសចិននឹងគាំទ្រជានិច្ចឱ្យអង្គការសុខភាពពិភពលោកដើរតួនាទីជាស្នូលក្នុងការសម្របសម្រួលការប្រយុទ្ធប្រឆាំងនឹងការរាតត្បាតនៃជំងឺឆ្លងទូទាំងពិភពលោក។លោកក៏បានអំពាវនាវដល់សហគមន៍អន្ដរជាតិពួតដៃគ្នាដើម្បីផ្តល់ការគាំទ្រដល់បណ្តាប្រទេសកំពុងអភិវឌ្ឍន៍និងពង្រឹងកិច្ចសហប្រតិបត្តិការត្រីភាគីនិងពហុភាគី។
លោក Tedros Adhanom Ghebreyesus ប្រធានអង្គការសុខភាពពិភពលោកបានប្រកាសថា សន្និសីទស្តីពីការសន្យាបរិច្ចាគប្រាក់អន្តរជាតិដើម្បីទប់ទល់នឹងជំងឺកូវីដ ១៩ ទូទាំងពិភពលោកដែលបានធ្វើឡើងនាថ្ងៃនេះរៃអង្គាសបានថវិកាប្រមាណ ៧,៤ ពាន់លានអឺរ៉ូដែលនឹងត្រូវប្រើដើម្បីពន្លឿនការសិក្សាស្រាវជ្រាវនិងការអភិវឌ្ឍព្រមទាំងការចែកចាយប្រកបដោយយុត្តិធម៌នូវវ៉ាក់សាំងសម្រាប់ទប់ទល់នឹងជំងឺកូវីដ ១៩ ឧបករណ៍ធ្វើតេស្តវីរុសនិងវិធីព្យាបាល៕