ពេលថ្មីៗកន្លងទៅនេះ វេបសាយនៃមជ្ឈមណ្ឌលបង្ការនិងគ្រប់គ្រងជំងឺរបស់សហរដ្ឋអាមេរិកបានប្រកាសរបាយការណ៍វិភាគដែលសរសេរដោយលោកស្រី Anne Schuchat អនុប្រធានទីមួយនៃមជ្ឈមណ្ឌលនេះដោយវិភាគឡើងវិញនូវការរាលដាលនៃជំងឺ COVID-19 នៅសហរដ្ឋអាមេរិក ។ របាយការណ៍បង្ហាញថា មូលហេតុធំៗចំនួន៤ដែលបណ្តាលឱ្យជំងឺឆ្លងរាលដាលឆាប់រហ័សនៅសហរដ្ឋអាមេរិក៖
ទីមួយ រដ្ឋាភិបាលមិនបានចេញបទបញ្ជាដាក់កំហិតទៅលើការធ្វើទេសចរណ៍ជាបន្ទាន់នោះទេ បណ្តាលឱ្យករណីនាំចូលពីក្រៅប្រទេសបន្តកើនឡើង ។
ទីពីរ មនុស្សមកពីតំបន់ខុសគ្នាជួបជុំគ្នាទ្រង់ទ្រាយធំជាមូលហេតុចម្បងនៃការរាតត្បាតទ្រង់ទ្រាយធំក្នុងខណៈពេលដំបូង ។
ទីបី ខ្វះវិធានការបង្ការនិងការពារ នាំឱ្យវីរុសបន្តរាតត្បាតបន្ទាប់ពីចូលទៅទីកន្លែងមានហានិភ័យខ្ពស់ដូចជាមណ្ឌលថែទាំសុខភាពនិងមន្ទីរពេទ្យជាដើមនិងតំបន់មានមនុស្សច្រើនដូចជាតំបន់ក្រុងញូវយ៉កជាដើម ។
ទីបួន ការធ្វើតេស្តរកវីរុសមានការលំបាកខ្លាំង ។ សមត្ថភាពធ្វើតេស្តមានកម្រិតរបស់សហរដ្ឋអាមេរិកមិនអាចរកឃើញករណីទាំងអស់ទេ ហើយអ្នកឆ្លងជំងឺ COVID-19 ដែលគ្មានរោគសញ្ញាក៏បានបង្កើនការលំបាកនៃការរកឃើញនិងគ្រប់គ្រងជំងឺឆ្លងនេះដែរ ។
របាយការណ៍បានបង្ហាញថា បច្ចុប្បន្ន វីរុសជំងឺ COVID-19 បានបន្តរាតត្បាតនៅសហរដ្ឋអាមេរិកដដែល ។ បច្ចុប្បន្ននេះ ជនជាតិអាមេរិកភាគច្រើននៅតែងាយឆ្លងជំងឺ COVID-19 ដូច្នេះ ត្រូវបន្តខិតខំប្រឹងប្រែងដើម្បីទប់ស្កាត់វីរុសនេះកុំឱ្យរាតត្បាតនៅសហរដ្ឋអាមេរិក ។
