កាលពីពេលថ្មីៗនេះ ប្រព័ន្ធផ្សព្វផ្សាយTelegram ដែលជាប្រព័ន្ធផ្សព្វផ្សាយសំខាន់នៃប្រទេសក្រូអាតបានចេញផ្សាយបទវិភាគមួយក្រោមចំណងជើងថា« ការវិភាគយ៉ាងស៊ីជម្រៅ ៖ នេះទើបជាមូលហេតុយ៉ាងពិតប្រាកដដែលធ្វើឱ្យអាមេរិកនិងប្រទេសលោកខាងលិចចោទប្រទេសចិនក្រោមលេសជំងឺកូវីដ ១៩ » ។ បទវិភាគនេះបានបញ្ជាក់ថា អាមេរិកនិងប្រទេសលោកខាងលិចបានច្រានចោលទំនួលខុសត្រូវក្រោមលេសជំងឺឆ្លង គឺក្នុងគោលបំណងការពារផលប្រយោជន៍ផ្ទាល់ខ្លួន ។
អត្ថបទបានបញ្ជាក់ថា ប្រជាជនអាមេរិកច្រើនឡើងៗបានថ្កោលទោសដល់លោកត្រាំដែលធ្វើការងារត្រៀមលក្ខណៈមិនគ្រប់គ្រាន់សម្រាប់ទប់ទល់នឹងជំងឺកូវីដ ១៩ ឯលោកត្រាំបានប្រើប្រាស់វិធីនេះដើម្បីញុះញង់ដល់ប្រជាជនអាមេរិកឱ្យបញ្ចេញកំហឹងទៅលើប្រទេសចិនវិញ។ អត្ថបទនេះបានវិភាគថា បើមើលពីពាក្យសម្តីនិងទង្វើនានារបស់លោកត្រាំ គឺគ្មានអ្វីគួរឱ្យចម្លែកទេ ហេតុអ្វីបានជាគ្មាននរណាជឿលើលោកត្រាំ ថែមទាំងបានរិះគន់លោកដែលមិនបានចាត់វិធានការបន្ទាន់ដើម្បីជួយសង្គ្រោះអាយុជីវិតមនុស្សរាប់ម៉ឺននាក់ ។
ជាចុងក្រោយ អត្ថបទនេះបានដកស្រង់ពាក្យសម្តីរបស់លោកឯកអគ្គរដ្ឋទូតចិនប្រចាំនៅប្រទេសក្រូអាតថា ក្នុងការប្រយុទ្ធគ្នារវាងមនុស្សនិងវីរុស ប្រជាជនចិននិងក្រូអាតនឹងចាប់ដៃជាមួយគ្នាយ៉ាងមុតមាំដើម្បីយកឈ្នះលើជំងឺកូវីដ ១៩ ។