ជំងឺកូវីដ១៩បានផ្ទុះរាតត្បាតនៅតំបន់ជាច្រើនលើពិភពលោក តើត្រូវវាយតម្លៃយ៉ាងដូចម្តេចចំពោះបទពិសោធន៍របស់ប្រទេសចិនក្នុងការបង្ការនិងគ្រប់គ្រងជំងឺឆ្លង? តើត្រូវមើលយ៉ាងណាចំពោះ”ពាក្យសម្តីស្តីពីឧបាយកលខាងប្រភពវីរុស” និង”ពាក្យសម្តីស្តីពីទំនួលសុខត្រូវ” ដែលចេះតែលេចចេញជារឿយៗនោះ? នាថ្ងៃទី ១ ខែឧសភា លោករីឆាត ហូដូន និពន្ធនាយកនៃទស្សនាវដ្តី«the Lancet» ដែលជាទស្សនាវដ្តីវេជ្ជសាស្ត្រអន្តរជាតិកំពូលបានផ្តល់បទសម្ភាសន៍ជាមួយអគ្គស្ថានីយវិទ្យុនិងទូរទស្សន៍មជ្ឈិមចិន ដើម្បីឆ្លើយតបនឹងបញ្ហាដែលមនុស្សទាំងពួងបានយកចិត្តទុកដាក់ទាំងនេះ។
លោកហូដូនបានថ្លែងថា ប្រទេសចិនមានបទពិសោធន៍ជាច្រើនដែលមានតម្លៃឱ្យពិភពលោករៀនសូត្រតាម។ ឧទាហរណ៍ដូចជាមន្ទីរពេទ្យបណ្តោះអាសន្ន វាគឺជាវិធានការច្នៃប្រឌិតថ្មីមួយដែលបានដើរតួនាទីសំខាន់ណាស់ក្នុងការទប់ទល់នឹងជំងឺឆ្លងរបស់ប្រទេសចិន។
ទាក់ទិននឹងពាក្យចចាមអារាមដូចជា ”ពាក្យសម្តីស្តីពីឧបាយកលខាងប្រភពវីរុស” លោកហូដូនបានថ្លែងថា ពាក្យសម្តីទាំងនេះគឺគួរឱ្យអស់សំណើចណាស់ វានឹងបង្កជាផលប៉ះពាល់ដល់ការទប់ទល់នឹងជំងឺឆ្លង។ យើងចាំបាច់ត្រូវតែស្វែងយល់ពីប្រភពវីរុស និងសិក្សាវាដោយអាកប្បកិរិយាបែបវិទ្យាសាស្ត្រ ដើម្បីកុំឱ្យពាក្យសម្តីស្តីពីឧបាយកលបែបនេះរំខានដល់ការគិតពិចារណារបស់យើង។
លោកហូដូនបានថ្លែងទៀតថា គ្រូពេទ្យនិងអ្នកវិទ្យាសាស្រ្តរបស់អាមេរិកបានឆ្លើយតបល្អណាស់ក្នុងការទប់ទល់នឹងជំងឺឆ្លង ប៉ុន្តែអ្នកនយោបាយអាមេរិកបែរជាធ្វើឱ្យលោកអស់សង្ឃឹមណាស់ ដោយសារពួកគេបាននិយាយបំប៉ោងពីពាក្យសម្តីស្តីពីឧបាយកល និងគាំទ្រវិធីសាស្ត្រព្យាបាលមួយចំនួនដែលខ្វះភស្តុតាងពិតប្រាកដ ក៏ដូចជារិះគន់ដោយចំហចំពោះប្រទេសឬអង្គការផ្សេងៗ។ ទង្វើបែបនេះគ្មានផលប្រយោជន៍អីទេ អ្វីដែលយើងគួរធ្វើគឺបង្កើនកិច្ចសហប្រតិបត្តិការដើម្បីទប់ទល់នឹងបញ្ហាប្រឈមដែលបណ្តាលមកពីជំងឺឆ្លង ចំណែកឯការបំបែកបំបាក់ទំនាក់ទំនងរវាងប្រទេសនានាគឺមិនអាចទប់ទល់ដោយមានប្រសិទ្ធភាពនូវការគំរាមកំហែងដែលមនុស្សជាតិទាំងមូលកំពុងប្រឈមនេះបានទេ៕