ពេលថ្មីៗកន្លងទៅ សហគមន៍អន្តរជាតិបានយកចិត្តទុកដាក់ខ្ពស់ចំពោះសន្តិសុខស្បៀងអាហារជាសកលដែលរងឥទ្ធិពលពីការរីករាលដាលនៃជំងឺCOVID-19 ។ ពេលឆ្លើយតបសំណួរពាក់ព័ន្ធកាលពីថ្ងៃទី ៣០ ខែមេសា លោកGeng Shuang អ្នកនាំពាក្យក្រសួងការបរទេសចិនបានលើកឡើងថា ការគាំពារសន្តិសុខស្បៀងអាហារជាសកល ជាកាតព្វកិច្ចមួយរបស់បណ្តាប្រទេស ។ ប្រទេសចិននឹងបន្តធ្វើកិច្ចសហប្រតិបត្តិការនិងកិច្ចសម្របសម្រួលជាមួយបណ្តាភាគី ពោលគឺស្របនឹងពេលរួមគ្នាប្រយុទ្ធប្រឆាំងនឹងជំងឺឆ្លង ក៏ធ្វើកិច្ចខិតខំប្រឹងប្រែងក្នុងការគាំពារសន្តិសុខស្បៀងអាហារផងដែរ ដើម្បីរួមចំណែកថ្មីក្នុងការជំរុញការបង្កើតសហគមន៍រួមវាសនារបស់មនុស្សជាតិ ។
លោកGeng Shuangបានថ្លែងទៀតថា ប្រទេសចិនបានចូលរួមយ៉ាងសកម្មក្នុងអភិបាលកិច្ចសន្តិសុខស្បៀងអាហាររបស់ពិភពលោកក្នុងរយៈពេលយូរ ដែលបានក្លាយទៅជាប្រទេសកំពុងអភិវឌ្ឍន៍ដែលបានផ្តល់ជំនួយឧបត្ថម្ភជាថវិកាច្រើនជាងគេ ចាត់បញ្ជូនអ្នកជំនាញច្រើនជាងគេ និងអនុវត្តគម្រោងច្រើនជាងគេក្នុងក្របខ័ណ្ឌកិច្ចសហប្រតិបត្តិការរវាងប្រទេសកំពុងអភិវឌ្ឍន៍នៃអង្គការស្បៀងអាហារនិងកសិកម្មអង្គការសហប្រជាជាតិ ៕