ការផ្ទុះឡើងនូវករណីជំងឺកូវីដ១៩បាននាំមកនូវការប្រឈមយ៉ាងខ្លាំងក្លាដល់អង្គភាពសេដ្ឋកិច្ចនៅលើពិភពលោកទាំងមូល ។ មុខរបរហិរញ្ញវត្ថុសកលលោកទាំងមូលបានរៀបចំកិច្ចសន្ទនាអន្តរជាតិតាមរយៈប្រព័ន្ធវីដេអូជាលើកដំបូង ដើម្បីរួមគ្នាពិគ្រោះពិភាក្សាគ្នាអំពីប្រធានបទ ដូចជាកិច្ចសហប្រតិបតិ្តការអន្តរជាតិក្រោមបរិការណ៍ករណីជំងឺឆ្លង នវានុវត្តន៍និងការអភិវឌ្ឍរបស់ឧស្សាហកម្ម និងការស្តារឡើងវិញនៃមុខរបរហិរញ្ញវត្ថុជាដើម ។
នៅថ្ងៃទី ២៨ ខែមេសា បុរីហិរញ្ញវត្ថុស្ថិតនៅខណ្ឌ Lujiazui ក្រុងសៀងហៃបានរៀបចំធ្វើកិច្ចសន្ទនាតុមូលតាមប្រព័ន្ធវីដេអូ ក្រោមប្រធានបទ តភ្ជាប់ពិភពលោកទាំងមូល ឈ្នះ-ឈ្នះនៅពេលអនាគត នេះគឺជាលើកទីមួយហើយ ដែលប្រទេសចិនបានផ្តួចផ្តើមគំនិតឱ្យបង្កើតវេទិកាផ្លាស់ប្តូរនិងសន្ទនាគ្នារវាងបុរីហិរញ្ញវត្ថុអន្តរជាតិ ។
មជ្ឈមណ្ឌលហិរញ្ញវត្ថុអន្តរជាតិចំនួន៦ នៅលើពិភពលោក និងស្ថាប័នពាក់ព័ន្ធបានចូលរួមកិច្ចសន្ទនាលើកនេះ ។ ក្នុងកិច្ចប្រជុំតុមូល បុរីហិរញ្ញវត្ថុ Lujiazui ក្រុងសៀងហៃបានលើកឡើងពី «លិខិតផ្តួចផ្តើមស្តីពីទីក្រុងដែលជាមជ្ឈមណ្ឌលហិរញ្ញវត្ថុនៅលើពិភពលោកបង្កើនកិច្ចសហប្រតិបតិ្តការ រួមគ្នាទប់ទល់នឹងជំងឺឆ្លង ក្នុងន័យបង្កើតទីផ្សារហិរញ្ញវត្ថុអន្តរជាតិដែលមានស្ថិរភាព សុវត្ថិភាពនិងមានរបៀបរៀបរយថែមទៀត» ក្នុងន័យអំពាវនាវទីក្រុងនានាដែលជាមជ្ឈមណ្ឌលហិរញ្ញវត្ថុនៅលើពិភពលោកពង្រីកឧត្តមភាពធនធាន បង្កើនការប្រាស្រ័យទាក់ទងនិងកិច្ចសហប្រតិបតិ្តការគ្នា ដើម្បីធានាខ្សែសង្វាក់ផ្គត់ផ្គង់និងខ្សែសង្វាក់ឧស្សាហកម្មជាសកលឱ្យមានភាពបើកចំហ ស្ថិរភាព សុវត្ថិភាពនិងដំណើរការដោយរលូន ក៏ដូចជាធ្វើឱ្យសេដ្ឋកិច្ចសេវាកម្មអាចស្តារឡើងវិញប្រកបដោយភាពនឹងនរផងដែរ ៕