ថ្ងៃទី២៨ខែមេសា លោកកឹងស័ងអ្នកនាំពាក្យក្រសួងការបរទេសចិនបានថ្លែងនៅក្រុងប៉េកាំងថា ក្នុងសភាពការណ៍បច្ចុប្បន្នដែលករណីជំងឺកូវីដ១៩បានវាយប្រហារសេដ្ឋកិច្ចពិភពលោកពីគ្រប់ជ្រុងជ្រោយ រំពឹងថា ប្រទេសដទៃទៀតអាចរួមសហការជាមួយប្រទេសចិន ដើម្បីធ្វើរឿងមានអំណោយផលដល់កិច្ចសហប្រតិបត្តិការអន្តរជាតិនិងបង្កើនការកសាងទំនុកចិត្តរវាងគ្នានិងគ្នាឱ្យបានកាន់តែច្រើន តែគឺមិនមែនមាត់និយាយផ្សេងទង្វើធ្វើផ្សឹងនោះទេ។
ពេលផ្តល់បទសម្ភាសន៍នាពេលកន្លងទៅថ្មីៗនេះ ឯកអគ្គរដ្ឋទូតចិនប្រចាំនៅអូស្រ្តាលីបានថ្លែងថា ការអនុវត្តវិធីសាស្រ្តត្រួតពិនិត្យឯករាជ្យរបស់អូស្រ្តាលីចំពោះជនជាតិចិនប្រហែលនឹងបណ្តាលឱ្យប្រជាជនចិនមិនចង់ទៅធ្វើទេសចរណ៍និងបន្តការសិក្សានៅអូស្រ្តាលីឬក៏មិនចង់ទិញទំនិញរបស់អូស្រា្តលី រដ្ឋមន្រ្តីការបរទេសអូស្រ្តាលីបែរជាចោទថា នេះគឺជាការគំរាមកំហែងខាងសេដ្ឋកិច្ចរបស់ប្រទេសចិន។
ទាក់ទិននឹងរឿងនេះ លោកកឹងស័ងបានថ្លែងក្នុងសន្និសីទសារព័ត៌មានជាប្រចាំថា “ជានិច្ចកាល ភាគីចិនតែងតែប្រកាន់ខ្ជាប់ការអភិវឌ្ឍទំនាក់ទំនងសហប្រតិបត្តិការដ៏មេត្រីភាពជាមួយប្រទេសដទៃទៀតដោយឈរលើមូលដ្ឋានសមភាពនិងគោរពគ្នាទៅវិញទៅមក ។ខ្ញុំស្នើអ្នកទាំងអស់គ្នាអានដោយផ្ចត់ផ្ចង់នូវសុន្ទរកថាដើមរបស់ឯកអគ្គរដ្ឋទូតចិនប្រចាំនៅអូស្រ្តាលី ។ ការបង្ហាញឥរិយាបថរបស់ឯកអគ្គរដ្ឋទូតចិនគឺការព្រួយបារម្ភចំពោះពាក្យសម្តីនិងទង្វើដ៏ខុសឆ្គងរបស់ភាគីអូស្រ្តាលីដែលបណ្តាលឱ្យប្រជាជនចិនមិនពេញចិត្ត នេះគឺជាការព្រួយបារម្ភចំពោះទំនាក់ទំនងរវាងប្រទេសទាំងពីរដែលមានលទ្ធភាពនឹងរងផលប៉ះពាល់ ដូចនេះ គ្មានការគំរាមកំហែងខាងសេដ្ឋកិច្ចនោះទេ”៕
