“លោកPompeoមិនត្រឹមតែមិនបានបង្ហាញឱ្យឃើញនូវសមត្ថភាពដឹកនាំអ្វីនោះទេ ថែមទាំងបានវាយប្រហារគូប្រកួតរបស់អាមេរិកជាពិសេសគឺចិននិងអ៊ីរ៉ង់ដោយប្រើជំងឺកូវីដ១៩ធ្វើជាលេសទៀតផង ប្រការនេះបានបន្សោយយ៉ាងខ្លាំងនូវកិច្ចសហប្រតិបត្តិការប្រយុទ្ធប្រឆាំងនឹងជំងឺឆ្លងលើពិភពលោកទាំងមូល រីឯកិច្ចសហប្រតិបត្តិការគឺជាបញ្ហាបន្ទាន់ជាងគេនាពេលបច្ចុប្បន្ន “។ ពេលកន្លងទៅថ្មីៗនេះ វេបសាយPoliticoដែលជាវេបសាយព័ត៌មាននយោបាយអាមេរិកបានរិះគន់រដ្ឋមន្រ្តីការបរទេសអាមេរិកបច្ចុប្បន្ន ហើយការរិះគន់ស្រដៀងគ្នានេះក៏កំពុងក្លាយជាគំនិតឯកភាពរួមក្នុងប្រទេសអាមេរិកដែរ ។
តាំងពីជំងឺកូវីដ១៩បានផ្ទុះរាលដាលមក ក្នុងនាមជាមន្រ្តីការទូតឋាបៈទី១របស់អាមេរិក លោកPompeoមិនបានធ្វើអ្វីសោះក្នុងការបង្ការនិងគ្រប់គ្រងជំងឺឆ្លង លោកបានផ្សារភ្ជាប់វីរុសជាមួយក្រុងវូហានដោយចេតនាអាក្រក់ គឺដើម្បីបង្កភាពបដិបក្ខគ្នាតាមទម្រង់ពូជសាសន៍និយម លាបពណ៌លើការខិតខំប្រឹងប្រែងប្រយុទ្ធប្រឆាំងនឹងជំងឺឆ្លងរបស់ប្រទេសចិន ប៉ុនប៉ងចង់បង្វែរក្រសែភ្នែកអន្តរជាតិនិងច្រានទំនួលខុសត្រូវចោល។
លោកPompeoគប្បីដឹងច្បាស់ថា សត្រូវរបស់អាមេរិកគឺវីរុស តែមិនមែនប្រទេសចិនទេ ទង្វើណាដែលបំផ្លិចបំផ្លាញដល់សាមគ្គីភាពនិងធ្វើឱ្យអន្តរាយដល់ទំនុកចិត្តរវាងគ្នាបានត្រឹមតែធ្វើឱ្យវិបត្តិកាន់តែខ្លាំងឡើងៗនិងបន្សោយការខិតខំប្រឹងប្រែងជាសកលប៉ុណ្ណោះ នៅទីបំផុត ក៏នឹងប៉ះពាល់ដល់ផលប្រយោជន៍ផ្ទាល់ខ្លួនរបស់អាមេរិក ។ ប្រសិនបើលោកPompeoបន្តមានភាពមានះបែបនេះតទៅទៀត ដោយបន្តតម្លើងផលប្រយោជន៍នយោបាយផ្ទាល់ខ្លួននៅលើផលប្រយោជន៍សាធារណៈ នោះលោកច្បាស់ជានឹងត្រូវប្រជាជនអាមេរិកលះបង់ចោល ហើយនឹងបន្សល់ទុកកេរ្តិ៍ឈ្មោះអសោចក្នុងប្រវត្តិសាស្រ្តការទូតអាមេរិកមិនខាន ៕
