ថ្ងៃទី២៧ខែមេសា លោក Geng Shuang អ្នកនាំពាក្យក្រសួងការបរទេសចិនបានថ្លែងនៅក្រុងប៉េកាំងថា នាពេលថ្មីៗកន្លងទៅនេះ ក្នុងប្រទេសអាមេរិក មានការបញ្ចេញមតិជាច្រើនដែលបានចោទសួរថា តើរដ្ឋាភិបាលអាមេរិកបានទប់ទល់នឹងករណីជំងឺឆ្លងដោយទាន់ពេលវេលានិងមានប្រសិទ្ធភាពឬអត់ ទាក់ទិននឹងរឿងនេះ ប្រទេសចិនសង្ឃឹមអាមេរិកអាចឆ្លើយតបនឹងការយកចិត្តទុកដាក់ពីសំណាក់ប្រជាជនក្នុងស្រុកក៏ដូចជាសហគមន៍អន្តរជាតិដោយទាន់ពេលវេលា ។
សូមបញ្ជាក់ថា នាពេលថ្មីៗកន្លងទៅនេះ ប្រព័ន្ធសារព័ត៌មានសំខាន់ៗជាច្រើនរបស់អាមេរិកបានចុះផ្សាយដំណឹងថា វិធានការអសមត្ថភាពរបស់រដ្ឋាភិបាលអាមេរិកបានបណ្តាលឱ្យជំងឺឆ្លងរីករាលដាលយ៉ាងធ្ងន់ធ្ងរ ។ ក្រៅពីនេះ មានដំណឹងផ្សាយឱ្យដឹងទៀតថា ករណីស្លាប់ដោយសារជំងឺកូវីដ១៩មុនគេបង្អស់នៅអាមេរិកប្រហែលកើតឡើងនៅមុនពេលធ្វើរោគវិនិច្ឆ័យជាផ្លូវការយ៉ាងច្រើន ។ ទាក់ទិននឹងរឿងនេះ លោក Geng Shuang បានលើកឡើងក្នុងសន្និសីទសារព័ត៌មានជាប្រចាំនៃក្រសួងការបរទេសចិនថា “ប្រទេសចិនសង្ឃឹមអាមេរិកចាត់វិធានការជាក់ស្តែងនិងមានប្រសិទ្ធភាពក្នុងន័យគាំពារឱ្យបានល្អនូវសុវត្ថិភាពអាយុជីវិតនិងសុខភាពរបស់ប្រជាជនក្នុងស្រុក ដោយប្រកាន់យកអាកប្បកិរិយាបើកចំហ តម្លាភាពនិងមានទំនួលខុសត្រូវ ព្រមនិងរួមសហការជាមួយសហគមន៍អន្តរជាតិដើម្បីគាំពារសន្តិសុខសុខាភិបាលសាធារណៈជាសកលផងដែរ ។”