តាំងពីសមាជបក្សកុម្មុយនិស្តចិនលើកទី ១៨ មក លោកស៊ីជីនភីង មេដឹកនាំកំពូលប្រទេសចិនបានចាត់ទុកការកសាងអរិយធម៌អេកូបរិស្ថានជាខ្លឹមសារសំខាន់នៃការត្រួតពិនិត្យក្នុងស្រុកជាប់ជានិច្ច ។ ពេលកន្លងទៅថ្មីៗនេះ លោកស៊ីជីនភីងបានអញ្ជើញចុះត្រួតពិនិត្យខេត្តស្រានស៊ី ភាគខាងលិចប្រទេសចិន ដំណើរទស្សនកិច្ចដំបូងគឺនៅតំបន់អភិរក្សធម្មជាតិថ្នាក់ជាតិQinling ។
ក្នុងនាមជាតំបន់អេកូបរិស្ថានសំខាន់នៃប្រទេសចិន បរិស្ថានធម្មជាតិនៃQinlingធ្លាប់ត្រូវបំផ្លាញដោយសារបញ្ហាសាងសង់វីឡាដោយខុសច្បាប់ ។ លោកស៊ីជីនភីងបានសួរដល់បញ្ហានេះ ៦ លើក តម្រូវឱ្យដេញដល់បញ្ហាបែបនេះដល់ទីបញ្ចប់ ។ នាឆ្នាំ ២០១៨ ផ្ទះវីឡាខុសច្បាប់ជាង ១១០០ ខ្នងនៃតំបន់នេះត្រូវរុះរើតាមច្បាប់ មន្ត្រីមួយចំនួនបានត្រូវកសាងសំណុំរឿងស៊ើបអង្កេតដោយសារបានល្មើសពិន័យនិងល្មើសច្បាប់ ។ ការនេះត្រូវមតិសាធារណៈសម្គាល់ជាទូទៅថាជាសញ្ញាដ៏ខ្លាំងក្លាដែលប្រទេសចិនបង្កើនការការពារបរិស្ថាននិងផ្តន្ទាទោសអំពើមិនបំពេញកិច្ចការរបស់មន្ត្រី ។
តាំងពីសមាជបក្សកុម្មុយនិស្តចិនលើកទី ១៨ មក ជាពិសេសទន្ទឹមនឹងប្រទេសចិនឈានចូលដំណាក់កាលថ្មីនៃការអភិវឌ្ឍប្រកបដោយគុណភាពខ្ពស់ ការសម្រេចភាពឈ្នះ-ឈ្នះនៃការការពារបរិស្ថាននិងការអភិវឌ្ឍដោយកាត់បន្ថយភាពក្រីក្រ បានក្លាយជាមតិរួមគ្នានិងប្រតិបត្តិការនៃបក្សកាន់អំណាច រដ្ឋបាលថ្នាក់នានានិងសង្គមទាំងមូលនៃប្រទេសចិន ។
ឆ្នាំនេះ ប្រទេសចិននឹងបញ្ចប់ភារកិច្ចដែលបំបាត់ភាពក្រីក្របំផុត សម្រេចការកសាងរួចនូវសង្គមដែលប្រជាជនមានធូរធារបង្គួរដោយគ្រប់ជ្រុងជ្រោយ ។ ជំងឺកូវីដ១៩បាននាំមកនូវបញ្ហាប្រឈមដ៏ធ្ងន់ធ្ងរដល់ការអភិវឌ្ឍសេដ្ឋកិច្ចនិងសង្គមចិន ។ ចំពោះបញ្ហាទាំងនេះ លោកស៊ីជីនភីងបានថ្លែងថា មិនអាចបន្ធូរការការពារបរិស្ថានជាដាច់ខាត ។ លោកបានសង្កត់ធ្ងន់ថា ទឹកខៀវនិងភ្នំបៃតងគឺជាទ្រព្យសម្បត្តិធម្មជាតិផង ជាទ្រព្យសម្បត្តិសេដ្ឋកិច្ចផង ។
បើមនុស្សមិនខកចិត្តភ្នំបៃតង ក៏ភ្នំបៃតងមុខជាមិនខកចិត្តមនុស្សទេ ។ ពាក្យសម្តីនេះរបស់លោកស៊ីជីនភីងបានអធិប្បាយច្បាស់លាស់ម្តងទៀតនូវទំនាក់ទំនងឈ្នះ-ឈ្នះរវាងការការពារបរិស្ថាននិងការអភិវឌ្ឍសេដ្ឋកិច្ច ។ ក៏បានបង្ហាញដែរថា មិនថាជួបឧបសគ្គអ្វីខ្លះ ប្រទេសចិនសុទ្ធតែនឹងដើរលើផ្លូវអភិវឌ្ឍន៍បៃតងជាបន្តទៀត ៕