ប្រទេសចិននឹងសម្រេចភារកិច្ចលុបបំបាត់ភាពក្រីក្រទាំងស្រុងនិងកសាងសង្គមដែលប្រជាជនមានជីវភាពធូរធារបង្គួរដោយគ្រប់ជ្រុងជ្រោយក្នុងឆ្នាំ២០២០តាមផែនការកំណត់ ។ប៉ុន្តែ ករណីជំងឺCovid-19ស្រាប់តែផ្ទុះឡើង បណ្តាលឱ្យការលុបបំបាត់ភាពក្រីក្រប្រឈមមុខនឹងឥទ្ធិពលជាយថាហេតុ។ពេលបច្ចុប្បន្ននេះ នៅសល់តែរយៈពេលជាង២រយថ្ងៃ តើប្រទេសចិនអាចសម្រេចបាននូវគោដៅនេះតាមពេលកំណត់ឬអត់?
កាលពីថ្ងៃទី២០ដល់ថ្ងៃទី២៣ខែមេសា ក្នុងអំឡុងពេលដែលលោកស៊ីជីនភីងត្រួតពិនិត្យការងារនៅខេត្តស្រានស៊ី លោកបានចង្អុលបង្ហាញនូវទិសដៅនិងផ្លូវសម្រាប់វិធានការពុះពារឧបសគ្គនិងលុបបំបាត់ភាពក្រីក្រដូចជាជួយលុបបំបាត់បន្ទុករបស់ជនក្រីក្រតាមរយៈឧស្សាហកម្ម ការងារធ្វើ សុខភាពនិងការអប់រំជាដើមដោយបានបញ្ចេញនូវសញ្ញាយ៉ាងច្បាស់លាស់ថាប្រទេសចិននឹងសម្រេចនូវគោលដៅពុះពារឧបសគ្គនិងលុបបំបាត់ភាពក្រីក្រដោយគ្រប់ជ្រុងជ្រោយតាមពេលកំណត់ ដែលបង្ហាញឱ្យឃើញនូវការចាត់ទុកប្រជាជនជាសំខាន់ដែលជាទស្សនអភិបាលកិច្ចរបស់បក្សកាន់អំណាចនៃប្រទេសចិន។
កន្លែងដែលលោកស៊ីជីនភីងបានជ្រើសរើសដើម្បីចុះត្រួតពិនិត្យការងារពុះពារឧបសគ្គក្នុងការលុបបំបាត់ភាពក្រីក្រលើកនេះគឺមានអត្ថន័យយ៉ាងជ្រាលជ្រៅ ។ លោកស៊ីជីនភីងបានចុះទៅត្រួតពិនិត្យឧស្សាហកម្មផ្សិតត្រចៀកកណ្តុរ និងចម្ការតែ ព្រមទាំងបានទៅទស្សនាសហគមន៍ មណ្ឌលសុខភាពនិងសាលាបថមសិក្សាក្នុងតំបន់ ធានាជាក់លាក់នូវការអនុវត្តជាក់ស្តែងនូវការងារពាក់ព័ន្ធដើម្បីសម្រេចបាននូវគោលដៅដែលពិបាកសម្រេចបំផុតក្នុងការលុបបំបាត់ភាពក្រីក្រនៃប្រទេសចិន ពោលគឺធ្វើឱ្យជនក្រីក្រមិនខ្វះការហូបចុកនិងការស្លៀកពាក់ ទទួលបានការអប់រំជាកាតព្វកិច្ចនិងសេវាសុខាភិបាលជាមូលដ្ឋាន ព្រមទាំងទីលំនៅដានមានសុវត្ថភាព។
មុននេះ លោកស៊ីជីនភីងបានធ្វើជាអធិបតីនៃសន្និសីទការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន ដោយបានគូសបញ្ជាក់ថា ត្រូវធានាការប្រកបអាជីពនិងជីវភាពរស់នៅជាមូលដ្ឋានរបស់ប្រជាជន ។ ក្នុងដំណើរត្រួតពិនិត្យការងារលើកនេះ លោកស៊ីជីនភីងនៅបានធ្វើការចាត់ចែងជាក់ស្តែងនូវការងារកាត់បន្ថយភាពក្រីក្រជំហានខាងក្រោយផងដែរ។
ប្រសិនបើប្រទេសចិនអាចសម្រេចបាននូវគោលដៅលុបបំបាត់ភាពក្រីក្រដោយគ្រប់ជ្រុងជ្រោយតាមពេលកំណត់ក្នុងឆ្នាំ២០២០ គឺមានន័យថា ចិននឹងសម្រេចគោលដៅកាត់បន្ថយភាពក្រីក្រនៃរបៀបវារៈអភិវឌ្ឍន៍ជានិរន្តរភាពឆ្នាំ២០៣០ នៃអង្គការសហប្រជាជាតិ ១០ ឆ្នាំ មុនដែលមានអត្ថន័យសំខាន់ណាស់សម្រាប់ទូទាំងពិភពលោក។ លោក Robert Lawrance Kuhn ប្រធាននៃមូលនិធិ Kuhnអាមេរិក បានវាយតម្លៃថា ប្រវត្តិវិទូនាពេលអនាគតនឹងកត់ត្រាថា សកម្មភាពជួយលុបបំបាត់បន្ទុករបស់ជនក្រីក្រដែលមិនធ្លាប់មានក្នុងប្រវត្តសាស្ត្រនៃប្រទេសចិន គឺជាការចូលរួមចំណែកដ៏សំខាន់បំផុតក្នុងការកែលម្អស្ថានភាពរស់នៅរបស់មនុស្សជាតិក្នុងប្រវត្តិសាស្ត្រពិភពលោក៕
