កាលពីថ្ងៃទី២១ខែមេសា លោក Gengshuang អ្នកនាំពាក្យក្រសួងការបរទេសចិនបានថ្លែងថា ការចោទប្រទេសចិនថា ជាមូលហេតុនៃគ្រោះរាំងស្ងួតនៅប្រទេសផ្នែកខាងក្រោមទន្លេមេគង្គគឺគ្មានភស្តុតាងអ្វីទេ ។
លោក Gengshuang បានថ្លែងថា ក្នុងមួយរយៈពេលកន្លងទៅនេះ លេខាធិការដ្ឋាននៃគណៈកម្មាធិការទន្លេមេគង្គបានប្រកាសរបាយការណ៍ប្រចាំសប្តាហ៍ស្តីពីសភាពការណ៍ទឹកទន្លេមេគង្គបានពិនិត្យពិច័យតាមបែបវិទ្យាសាស្ត្រចំពោះគ្រោះរាំងស្ងួតលើកនេះ ។ ចាប់ពីខែឧសភាឆ្នាំ២០១៩មក តំបន់ភាគច្រើនតាមដងទន្លេឡានឆាង-មេគង្គបានលេចចេញសភាពការណ៍រាំងស្ងួតនិងខ្វះទឹកភ្លៀង ។ លំហូរទឹកទន្លេឡានឆាងបានត្រឹម១៣,៥ភាគរយនៃលំហូរទឹកដងទន្លេឡានឆាង-មេគង្គ ដូច្នេះ បរិមាណទឹកហូរនៃផ្នែកខាងក្រោមទន្លេឡានឆាងគឺរងឥទ្ធិពលសំខាន់ពីការធ្លាក់ភ្លៀង ។
លោក Gengshuang បានថ្លែងទៀតថា ចាប់តាំងពីឆ្នាំ២០១៩មក ខេត្តយូណានប្រទេសចិនក៏បានរងគ្រោះរាំងស្ថួតដ៏ធ្ងន់ធ្ងរដែរ ។ ប៉ុន្តែយ៉ាងណាក៏ដោយ ភាគីចិននៅតែបានខិតខំប្រឹងប្រែងអស់ពីសមត្ថភាពដើម្បីធានាបរិមាណទឹកហូរដ៏សមហេតុផលនៃទន្លេឡានឆាង។ បច្ចុប្បន្ននេះ ប្រទេសតាមដងទន្លេមេគង្គបានបង្កើតយន្តការផ្លាស់ប្តូរដ៏ចាស់ទុំ ភាគីចិននឹងរួមជាមួយប្រទេសតាមដងទន្លេមេគង្គទប់ទល់នឹងបម្រែបម្រួលអាកាសធាតុ និងបញ្ហាគ្រោះទឹកជំនន់ ។
