កាលពីថ្ងៃទី ៩ ខែមេសា ក្រុមប្រឹក្សាសន្តិសុខអង្គការសហប្រជាជាតិបានធ្វើសន្និសីទវីដេអូស្តីពីបញ្ហាជំងឺកូវីដ១៩ ដើម្បីស្តាប់របាយការណ៍របស់លោកអគ្គលេខាធិការអង្គការសហប្រជាជាតិ ។ លោកZhangjun តំណាងប្រទេសចិនប្រចាំជាអចិន្រ្តៃយ៍នៅអង្គការសហប្រជាជាតិបានថ្លែងថា ភាគីចិនរំពឹងថាសហគមន៍អន្តរជាតិអាចឆ្លើយតបយ៉ាងសកម្មនឹងសេចក្តីអំពាវនាវរបស់អង្គការសហប្រជាជាតិ ដើម្បីរួមគ្នាទប់ទល់នឹងជំងឺកូវីដ១៩ ។
លោកZhangjunបានថ្លែងក្នុងសន្និសីទថា ភាគីចិនសូមកោតសរសើរចំពោះតួនាទីដឹកនាំនិងសម្របសម្រួលរបស់អង្គការសហប្រជាជាតិនិងអង្គការសុខភាពពិភពលោកក្នុងការទប់ទល់នឹងជំងឺកូវីដ១៩ ភាគីចិនសូមគាំទ្រយ៉ាងសកម្មចំពោះកិច្ចខិតខំរបស់អង្គការសហប្រជាជាតិក្នុងការទប់ទល់នឹងជំងឺនេះ ។
លោកZhangjunបានថ្លែងថា ការរាតត្បាតនៃជំងឺកូវីដ១៩បានបង្ហាញម្តងទៀតថា មនុស្សជាតិគឺជាសហគមន៍រួមវាសនាតែមួយ ។ បទពិសោធន៍ស្តីពីការទប់ទល់ជំងឺកូវីដ១៩នៃប្រទេសចិនក៏បានបង្ហាញផងដែរថា យើងអាចយកឈ្នះជំងឺនេះបាន ។ ប្រឈមមុខនឹងបញ្ហាជាសកល ការសាមគ្គីគ្នា ធ្វើកិច្ចសហប្រតិបត្តិការគ្នានិងជួយគ្នាទើបជាវិធីត្រឹមត្រូវ ។ គួរតែប្រឆាំងយ៉ាងម៉ឺងម៉ាត់ចំពោះអំពើដែលប្រើជំងឺកូវីដ១៩ទៅមួលបង្កាច់ប្រទេសដទៃនិងធ្វើឱ្យពាក់ព័ន្ធជាមួយនយោបាយ ៕
