កាលពីពេលថ្មីៗកន្លងទៅនេះ អ្នកដឹកនាំអាមេរិកបានប្រើពាក្យសម្តីវាយប្រហារទៅលើអង្គការសុខភាពភពលោកក្នុងកាលៈទេសៈជាច្រើន ដោយបានចោទប្រកាន់ថា អង្គការសុខភាពពិភពលោកបានលើកសំណើមិនត្រឹមត្រូវដល់អាមេរិកក្នុងការបង្ការជំងឺកូវីដ១៩ ព្រមទាំងអះអាងថានឹងគិតពិចារណាពីការឈប់ផ្តល់ថវិកាគាំទ្រដល់អង្គការសុខភាពពិភពលោកទៀតផង ។
ឆ្លើយតបនឹងការចោទប្រកាន់ដោយគ្មានហេតុផលរបស់អាមេរិក លោក Tedros ប្រធានអង្គការសុខភាពពិភពលោកបានថ្លែងកាលពីថ្ងៃទី ៨ ខែមេសាថា ការប្រើជំងឺកូវីដ១៩ ធ្វើការវាយប្រហារផ្នែកនយោបាយ គឺដូចជាការប្រឡែងលេងនឹងភ្លើង ។ បើសិនមិនចង់ឃើញថង់ដាក់សាកសពកាន់តែច្រើន នោះត្រូវធ្វើឱ្យវីរុសឃ្លាតឆ្ងាយពីនយោបាយ ធ្វើឱ្យជំងឺកូវីដ១៩ នៅដាច់ដោយឡែកពីគ្នាជាមួយនយោបាយ ។
លោកGuterres អគ្គលេខាធិការនៃអង្គការសហប្រជាជាតិក៏បានចេញសេចក្តីថ្លែងការណ៍កាលពីថ្ងៃដដែលនោះ ដោយបានអំពាវនាវដល់បណ្តាប្ររទេសនានាឱ្យផ្តល់ការគាំទ្រដល់ការងារនៃអង្គការសុខភាពពិភពលោកក្រោមសភាពដែលជំងឺកូវីដ១៩បានរីករាលដាលយ៉ាងខ្លាំងនាពេលបច្ចុប្បន្ននេះ ។ នេះបានបញ្ជាក់យ៉ាងច្បាស់នូវការថ្កោលទោសនិងការបដិសេធពីសំណាក់សហគមន៍អន្តរជាតិចំពោះករណីដែលអាមេរិកបានវាយប្រហារចំពោះអង្គការសុខភាពពិភពលោក ។
ពេលបច្ចុប្បន្ននេះ ទន្ទឹមនឹងជំងឺកូវីដ ១៩ បានរីករាលដាលនៅតំបន់អាស៊ីអាហ្រ្វិកនិងអាមេរិកឡាទីន ធនធានសុខាភិបាលសាធារណៈមានកង្វះខាតកាន់តែខ្លាំង បណ្តាប្រទេសកំពុងអភិវឌ្ឍន៍នានាត្រូវការជំនួយអន្តរជាតិជាបន្ទាន់ ។ ដោយការប្រកាន់ទស្សនឯកតោភាគីនិយម អាមេរិកបានប្រើពាក្យសម្តីវាយប្រហារទៅលើអង្គការសុខភាពពិភពលោកព្រមទាំងគំរាមកំហែងថានឹងឈប់ផ្តល់ជំនួយជាថវិកា នេះគ្មានអ្វីគួរឱ្យសង្ស័យទេថាជាការផ្តល់សញ្ញាគ្រោះថ្នាក់ដល់កិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងនឹងជំងឺកូវីដ ១៩ ហើយនឹងប៉ះពាល់ដល់ផលប្រយោជន៍របស់ប្រជាជននៃបណ្តាប្រទេសនានា ក្នុងនោះបូករួមទាំងប្រជាជនអាមេរិកផងដែរ ។