លោក Zhao Lijian អ្នកនាំពាក្យក្រសួងការបរទេសចិនបានថែ្លងប្រាប់អំពីការងាររបស់ក្រុមអ្នកជំនាញវេជ្ជសាស្ត្រចិនដែលផ្តល់ជំនួយគាំទ្រដល់កម្ពុជានៅក្រុងប៉េកាំងកាលពីថ្ងៃទី ៨ ខែមេសា។
លោក Zhao Lijian បានថែ្លងថា កាលពីថ្ងៃទី ៧ ខែមេសា ក្រុមអ្នកជំនាញវេជ្ជសាស្ត្រចិនដែលផ្តល់ជំនួយគាំទ្រដល់កម្ពុជាបានបញ្ចប់បេសកកម្មរបស់ខ្លួន ហើយបានវិលត្រឡប់មកដល់ប្រទេសចិនវិញ។ក្រុមអ្នកជំនាញវេជ្ជសាស្រ្តចិនបានទៅដល់ទីក្រុងភ្នំពេញកាលពីថ្ងៃទី ២៣ ខែមីនាកន្លងទៅ គឺជាក្រុមបុគ្គលិកពេទ្យប្រយុទ្ធប្រឆាំងនឹងជំងឺកូវីដ ១៩ ដំបូងបង្អស់មួយក្នុងចំណោមក្រុមអ្នកជំនាញដែលបានចាត់បញ្ជូនដោយប្រទេសចិនទៅកាន់បណ្តាប្រទេសអាស៊ាន។អំឡុងពេលនៅប្រទេសកម្ពុជា ក្រុមអ្នកជំនាញវេជ្ជសាស្រ្តចិនបានទៅសិក្សាការងារនៅតាមមន្ទីរពេទ្យ សហគមន៍ អាកាសយានដ្ឋាន សណ្ឋាគារនិងសួនឧស្សាហកម្មជារៀងរាល់ថ្ងៃ បានផ្តល់យោបល់ដល់ភាគីកម្ពុជាជាច្រើនដងនិងចែករំលែកនូវបទពិសោធន៍ក្នុងការធ្វើរោគវិនិច្ឆ័យនិងព្យាបាលជំងឺឆ្លងដែលទទួលបានការកោតសរសើរពីគ្រប់មជ្ឈដ្ឋាននៃប្រទេសកម្ពុជា។សម្តេចហ៊ុនសែន នាយករដ្ឋមន្រ្តីកម្ពុជាបានថែ្លងថា ស្រឡាញ់គ្នាក្នុងគ្រាក្រនិងស្គាល់មិត្តល្អក្នុងគ្រាលំបាក។ក្រុមអ្នកជំនាញវេជ្ជសាស្រ្តចិនដែលបានផ្តល់ជំនួយគាំទ្រដល់កម្ពុជាគឺជាឧទាហរណ៍ដ៏រស់រវើកមួយទៀតដែលបង្ហាញឱ្យឃើញថា "ពេលជួបការលំបាកទើបដឹងពីមនោសញ្ចេតនាពិត "រវាងប្រជាជនកម្ពុជានិងចិន។
លោក Zhao Lijian បានថែ្លងបន្តថា ប្រទេសចិនរីករាយបន្តផ្តល់ការគាំទ្រនិងជំនួយឧបត្ថម្ភតាមលទ្ធភាពរបស់ខ្លួនដល់មិត្តភក្តិកម្ពុជាស្របតាមតម្រូវការរបស់កម្ពុជាក្នុងការប្រយុទ្ធប្រឆាំងនឹងការរាតត្បាតនៃជំងឺនេះដើម្បីខិតខំយកឈ្នះលើសមរភូមិនៃការប្រយុទ្ធប្រឆាំងនឹងជំងឺ កូវីដ ១៩ ឱ្យបានឆាប់។លោកថែ្លងថា ស៊ូឡើង កម្ពុជា!
