កាលពីថ្ងៃទី ៦ ខែមេសា លោកCui Tiankai ឯកអគ្គរដ្ឋចិនប្រចាំនៅអាមេរិកបានចុះផ្សាយអត្ថបទនៅកាសែតញ៉ូវយ៉កថែមក្រោមចំណងជើងថា សហប្រតិបត្តិការគ្នា មុខជានឹងអាចពុះពារឧបសគ្គ ។ អត្ថបទសង្កត់ធ្ងន់ថា ចិននិងអាមេរិកគួរតែរួមសាមគ្គី ធ្វើកិច្ចសហប្រតិបត្តិការនិងជួយគ្នាទៅវិញទៅមក ។
លោកលើកឡើងថា ឥទ្ធិពលនៃការរីករាលដាលជំងឺកូវីដ១៩ លើកនេះមិនបែងចែកប្រទេសនិងជាតិសាសន៍ទេ ។ ប្រទេសចិនចងចាំថា មិត្តភក្តិមកពីតំបន់នានាលើពិភពលោកបានផ្តល់ការលើកទឹកចិត្តនិងការជួយឧបត្ថម្ភនៅគ្រាលំបាកបំផុត ក្នុងនោះមានជនជាតិអាមេរិកជាច្រើនផងដែរ ។ ឥឡូវនេះប្រទេសចិនក៏រីករាយផ្តល់ជំនួយទៅវិញ ដើម្បីរួមគ្នាពុះពារឧបសគ្គជាមួយពួកគេ ។
លោកបានសរសេរទៀតថា ប្រទេសចិននិងអាមេរិកគួរតែសាមគ្គីគ្នា ធ្វើសហប្រតិបត្តិការគ្នានិងជួយគ្នាទៅវិញទៅមក ។ ពេលថ្មីៗកន្លងទៅនេះ លោកស៊ីជីនភីង ប្រធានរដ្ឋចិនបានជួបពិភាក្សាតាមទូរស័ព្ទជាមួយលោកត្រាំ ប្រធានាធិបតីអាមេរិកតាមការណាត់ ដោយបានសង្កត់ធ្ងន់ថា ចិននិងអាមេរិកគួរតែសាមគ្គីគ្នាប្រយុទ្ធប្រឆាំងនឹងជំងឺកូវីដ ១៩ ហើយបានសន្យាថានឹងផ្តល់ការគាំទ្រទៅតាមលទ្ធភាព ។ បច្ចុប្បន្ន ភាគីចិនកំពុងជួយសម្របសម្រួលការបញ្ជាទិញសម្ភារៈទប់ទល់ជំងឺឆ្លងរបស់រដ្ឋាភិបាលអាមេរិកពីប្រទេសចិន ៕
