ក្នុងខណៈពេលជាគន្លឹះដែលពិភពលោកទាំងមូលបាននិងកំពុងប្រយុទ្ធប្រឆាំងនឹងករណីជំងឺឆ្លង កិច្ចប្រជុំកំពូលវិសាមញ្ញនៃអ្នកដឹកនាំប្រទេស G20 ដែលបើកធ្វើនៅថ្ងៃទី ២៦ ខែមីនាដើម្បីស្វែងរកវិធានការទប់ទល់នឹងការរីករាលដាលនៃជំងឺកូវីដ-19 បានបញ្ចេញសញ្ញាវិជ្ជមានសម្រាប់បណ្តាប្រទេសនានាធ្វើកិច្ចសហប្រតិបតិ្តការដោយសាមគ្គីភាពដើម្បីទប់ទល់នឹងករណីជំងឺឆ្លង ។
នាពេលថ្មីៗកន្លងទៅនេះ ប្រទេសចិននិងបណ្តាប្រទេសនានាលើសកលលោកបានពន្លឿនកិច្ចសហប្រតិបតិ្តការលើការសិក្សាស្រាវជ្រាវរកវ៉ាក់សាំងនិងវិធីព្យាបាលជំងឺកូវីដ-19ដែលប្រកបដោយប្រសិទ្ធភាព ព្រមទាំងបានផ្តល់ជំនួយជាសម្ភារៈវេជ្ជសាស្ត្រដល់បណ្តាប្រទេសនានាយ៉ាងសកម្ម កិច្ចសហប្រតិបតិ្តការជាសកលដើម្បីទប់ទល់នឹងករណីជំងឺឆ្លងបាននិងកំពុងពន្លឿនជំហានទៅមុខ ។
ប្រឈមនឹងស្ថានការណ៍រីករាលដាលនៃជំងឺឆ្លងនៅលើសកលលោកដែលមានភាពតានតឹងពីមួយថ្ងៃទៅមួយថ្ងៃ ការសិក្សាស្រាវជ្រាវរកវ៉ាក់សាំងជាចំណុចគន្លឹះក្នុងការទប់ទល់នឹងករណីជំងឺឆ្លង ។ នៅយប់ថ្ងៃទី ២៦ ខែមីនា ក្នុងកិច្ចប្រជុំកំពូលវិសាមញ្ញនៃអ្នកដឹកនាំប្រទេស G20 ដើម្បីស្វែងរកវិធានការទប់ទល់នឹងករណីជំងឺឆ្លង លោក ស៊ី ជីនភីង ប្រធានរដ្ឋចិនបានលើកឡើងពីគំនិតផ្តួចផ្តើមថា គួរតែប្រមូលផ្តុំកម្លាំងនៃបណ្តាប្រទេស នានា ធ្វើកិច្ចសហប្រតិបតិ្តការរួមដើម្បីពន្លឿនការងារសិក្សាស្រាវជ្រាវវិទ្យាសាស្ត្រ ដូចជាថ្នាំព្យាបាល វ៉ាក់សាំងនិងការធ្វើតេស្តរកវីរុសជាដើម ក្នុងន័យទទួលបានលទ្ធផលជាផ្លែផ្កាក្នុងពេលឆាប់ៗ ដើម្បីផ្តល់ផលផលប្រយោជន៍ដល់មនុស្សជាតិទាំងមូល ។
ក្នុងខណៈពេលពន្លឿនកិច្ចសហប្រតិបតិ្តការអន្តរជាតិដើម្បីសិក្សាស្រាវជ្រាវរកវ៉ាក់សាំង ប្រទេសចិនក៏បានផ្តល់ជំនួយជាសម្ភារៈវេជ្ជសាស្ត្រដល់បណ្តាប្រទេសនានាលើសកលលោកតាមលទ្ធភាពរបស់ខ្លួនផងដែរ ។ ពេលជួបពិភាក្សាតាមរយៈទូរស័ព្ទជាមួយលោកត្រាំ ប្រធានាធិបតីសហរដ្ឋអាមេរិកនៅថ្ងៃទី ២៧ ខែមីនា លោក ស៊ី ជីនភីង ប្រធានរដ្ឋចិនបានថ្លែងថា ក្នុងស្ថានការណ៍បែបនេះ ប្រទេសចិននិងអាមេរិកគួរតែរួមសាមគ្គីគ្នាដើម្បីទប់ទល់នឹងករណីជងឺឆ្លង ។ ប្រទេសចិនរីករាយបន្តចែករំលែកព័ត៌មាននិងបទពិសោធន៍របស់ខ្លួនជាមួយអាមេរិកដោយគ្មានការលាក់ទុកអ្វីឡើយ ។ ប្រទេសចិនយល់ពីភាពលំបាករបស់អាមេរិកនាពេលបច្ចុប្បន្ននេះ ហើយរីករាយផ្តល់ការគាំទ្រតាមលទ្ធភាពរបស់ខ្លួន ។
តាំងពីទ្វីបអឺរ៉ុបបានផ្ទុះរាលដាលករណីជំងឺឆ្លងមក ប្រទេសចិនបានចាត់បញ្ជូនក្រុមអ្នកជំនាញវេជ្ជសាស្ត្រជាច្រើនក្រុមទៅកាន់ប្រទេសអ៊ីតាលីជាដើម ដោយបានដឹកជញ្ជូនទៅជាមួយនូវសម្ភារៈវេជ្ជសាស្ត្រជាច្រើន ដើម្បីផ្តល់ជំនួយដល់ប្រទេសដែលរងផលប៉ះពាល់យ៉ាងធ្ងន់ធ្ងរ ។
នៅទ្វីបអាស៊ីវិញ ក្រៅពីបានផ្តល់ជំនួយជាសម្ភារៈវេជ្ជសាស្ត្រជាច្រើនដល់ប្រទេសអ៊ីរ៉ង់និងអ៊ីរ៉ាក់ជាដើម នាពេលថ្មីៗកន្លងទៅនេះ ក្រុមអ្នកជំនាញវេជ្ជសាស្រ្តនៃប្រទេសចិន ក៏បានធ្វើដំណើរទៅកាន់ប្រទេសប៉ាគីស្ថាន កម្ពុជានិងឡាវជាដើម ដោយបាននាំយកនូវសម្ភារៈវេជ្ជសាស្ត្រទៅជាមួយផងដែរ ។
ចំណែកនៅទ្វីបអាហ្វ្រិក កាលពីថ្ងៃទី ២២ ខែមីនា មូលនិធិសប្បុរសធម៌ របស់ លោក Jack Ma និងមូលនិធិសប្បុរសធម៌Alibabaក៏បានបរិច្ចាគម៉ាស់ សម្លៀកបំពាក់ការពារ របាំងមុខការពារ និងឧបករណ៍ធ្វើតេស្តរកវីរុសជាដើមសរុបជាង ៧លានឈុតដល់បណ្តាប្រទេសអាហ្រ្វិកនានា ៕