ថ្ងៃទី៣០ខែមីនា ក្រុមការងារដឹកនាំការទប់ទល់នឹងជំងឺកូវីដ១៩នៃមជ្ឈិមចិនបានបើកធ្វើកិច្ចប្រជុំ ដោយតម្រូវឱ្យធ្វើការងារបង្ការនិងគ្រប់គ្រងចំពោះអ្នកឆ្លងជំងឺដែលគ្មានរោគសញ្ញាឱ្យបានល្អ ព្រមទាំងត្រូវធ្វើតេស្តពិនិត្យរកវីរុសចំពោះអ្នកចូលដែនទាំងអស់ ។
កិច្ចប្រជុំលើកនេះបានគូសបញ្ជាក់ថា និន្នាការល្អប្រសើរនៃការងារបង្ការនិងគ្រប់គ្រងជំងឺឆ្លងក្នុងប្រទេសចិនត្រូវបានពង្រឹងជាបន្តបន្ទាប់ ប៉ុន្តែ ជំងឺឆ្លងនេះបាននិងកំពុងរាតត្បាតយ៉ាងខ្លាំងនៅទូទាំងពិភពលោក។ តំបន់នានាត្រូវប្រកាសព័ត៌មានស្តីពីជំងឺឆ្លងដោយមានតម្លាភាពនិងបើកចំហ បង្កើនកម្លាំងធ្វើតេស្តពិនិត្យរកវីរុសនិងដំឡើងគ្រឿងបរិក្ខារពាក់ព័ន្ធ ដើម្បីធ្វើតេស្តពិនិត្យរកវីរុសចំពោះអ្នកចូលដែនទាំងអស់ និងបង្ការចំពោះករណីនាំចូលយ៉ាងប្រាកដប្រជា ៕