ថ្ងៃទី៣០ខែមីនា លោក Xu Keming មន្ត្រីក្រសួងឧស្សាហកម្មនិងព័ត៌មានវិទ្យាចិនបានប្រាប់ឱ្យដឹងថា តាមការធ្វើស្ថិតិមិនទាន់សព្វគ្រប់គ្រាន់ គិតតាំងពីថ្ងៃទី១៩ខែមីនាមក ប្រទេសចិនបានផ្តល់ជំនួយជាបន្ទាន់នូវម៉ាស៊ីនដកដង្ហើមពហុមុខងារចំនួនជាង១៧០០គ្រឿងដល់បរទេស ដែលត្រូវជាចំនួនពាក់កណ្តាលនៃចំនួនសរុបដែលផ្គត់ផ្គង់ក្នុងស្រុកក្នុងឆ្នាំនេះ។
លោក Xu Keming បានថ្លែងក្នុងសន្និសីតកាសែតស្តីពីយន្តការសហការបង្ការនិងគ្រប់គ្រងរបស់ក្រុមប្រឹក្សាកិច្ចការរដ្ឋចិននាថ្ងៃដដែលថា បន្ទាប់ពីកើតមានករណីជំងឺឆ្លង រដ្ឋាភិបាលចិនបានជំរុញយ៉ាងពេញទំហឹងឱ្យសហគ្រាសផលិតបរិក្ខារវេជ្ជសាស្រ្តស្តារផលិតកម្មឡើងវិញ ដោយបានជួយដោះស្រាយបញ្ហាកង្វះខាតគ្រឿងបង្គុំនិងគ្រឿងបន្លាស់ ព្រមនិងបញ្ហារាំងស្ទះខាងចរាចរណ៍ទំនិញជាដើម។ បច្ចុប្បន្ននេះ សហគ្រាសពាក់ព័ន្ធរបស់ប្រទេសចិនបាននិងកំពុងផលិតម៉ាស៊ីនដកដង្ហើមពហុមុខងារស្ទើរតែ២៤ម៉ោងលើ២៤ម៉ោងដើម្បីចូលរួមការបង្ការនិងគ្រប់គ្រងជំងឺឆ្លងនៅទូទាំងពិភពលោក៕