ថ្ងៃទី ២៨ ខែមីនា វេបសាយ “The Atlantic” របស់សហរដ្ឋអាមេរិកបានបង្ហោះអត្ថបទរបស់លោក Peter Beinart សាស្ត្រាចារ្យព័ត៌មានវិទ្យានៃសកលវិទ្យាល័យក្រុងញូវយ៉ក អាមេរិកដែលមានចំណងជើងថា «លោកត្រាំបង្កភាពប្រេះស្រាំជាមួយចិននឹងនាំមកនូវផលប៉ះពាល់យ៉ាងធ្ងន់ធ្ងរ » ។
អត្ថបទនេះបានចង្អុលបង្ហាញថា មេរៀនសម្រាប់អាមេរិកដែលបណ្តាលមកពីករណីជំងឺកូវីដ-១៩មិនមែនត្រូវបញ្ឈប់កិច្ចសហប្រតិបតិ្តការជាមួយប្រទេសចិននោះឡើយ ផ្ទុយទៅវិញគឺចាំបាច់ត្រូវស្តារឡើងវិញនូវកិច្ចសហប្រតិបតិ្តការផ្នែកសុខាភិបាលរវាងអាមេរិកនិងចិនដែលរងការបំផ្លាញដោយរដ្ឋាភិបាលរបស់លោកត្រាំ ។
អត្ថបទនេះបានសរសេរទៀតថា នៅឆ្នាំ ២០២០ ខណៈពេលផ្ទុះរាលដាលនូវករណីជំងឺកូវីដ-១៩ លោកត្រាំបានស្នើឱ្យអាមេរិកកាត់បន្ថយថវិកាពាក់កណ្តាលដែលនឹងផ្តល់ជូនអង្គការសុខភាពពិភពលោក ។ ការកាត់បន្ថយបែបនេះបណ្តាលឱ្យស្ថាប័នសុខាភិបាលអាមេរិករងការប៉ះពាល់យ៉ាងធ្ងន់ធ្ងរពេលធ្វើសកម្មភាពនៅប្រទេសចិន ។ បច្ចុប្បន្ននេះ គ្រូពេទ្យនិងគិលានុបដ្ឋាយិកាអាមេរិកត្រូវការម៉ាស់ វ៉ែនតាការពារភ្នែក ស្រោមដៃ សម្លៀកបំពាក់ការពារ និងឧបករណ៍វាស់កម្តៅ ។ ប៉ុន្តែ វិធានការពន្ធគយរបស់អាមេរិកបានបង្កភាពលំបាកថែមទៀតសម្រាប់ការបញ្ជាទិញសម្ភារៈទាំងនេះ រឿងហួសហេតុខុសទំនងបំផុត គឺលោកJim Banks សមាជិកសភាជាន់ទាបអាមេរិកបែរជាអំពាវនាវឱ្យដំឡើងអត្រាពន្ធគយថែមទៀត ដើម្បីសងសឹកនឹង “វីរុសចិន” ។
អត្ថបទបានឱ្យដឹងទៀតថា ជាធម្មតា ការបង្កើនកិច្ចសហប្រតិបតិ្តការជាសកលអាចការពារសនិ្តសុខជូនប្រជាពលរដ្ឋអាមេរិកកាន់តែល្អ ។ បើគិតតាមបែបឡូហ្ស៊ីក ការធ្វើឱ្យកិច្ចសហប្រតិបតិ្តការរវាងអាមេរិកនិងចិនមានភាពកាន់តែស៊ីជម្រៅ វាជាការឆ្លើយតបនឹងការគំរាមកំហែងដ៏ខ្លាំងក្លាទាំងនេះ ៕
