ពេលបច្ចុប្បន្ននេះ ការរាតត្បាតនៃជំងឺកូរីដ១៩លើផ្ទៃអន្តរជាតិមាននិន្នាការរីករាលដាលយ៉ាងឆាប់រហ័ស។ ប្រទេសចិនបានលើកទឹកចិត្តនិងផ្តល់ជំនួយដល់បណ្តាប្រទេសនានាលើពិភពលោកដែលមានសភាពការណ៍ជំងឺកូវីដ១៩ធ្ងន់ធ្ងរតាមរយៈសកម្មភាពជាក់ស្តែងដូចជាជំនួយសម្ភារៈវេជ្ជសាស្រ្តគ្រប់ប្រភេទ ការចាត់បញ្ជូនក្រុមអ្នកជំនាញវេជ្ជសាស្រ្តទៅណែនាំអំពីការគ្រប់គ្រងជំងឺឆ្លងដល់កន្លែងផ្ទុះជំងឺ បុគ្គលិកពេទ្យនិងសមភាគីអន្តរជាតិធ្វើការសិក្សាស្រាវជ្រាវការព្យាបាលជំងឺតាមរយៈវីដេអូ ជាដើម។
ថ្ងៃទី២៦ខែមីនាតាមម៉ោងតំបន់ យន្តហោះពិសេសមួយគ្រឿងដែលផ្ទុកសម្ភារៈការពារជំងឺនិងបរិក្ខារវេជ្ជសាស្រ្តមានទម្ងន់ជាង៤០តោនបានហោះពីប្រទេសចិនទៅដល់អាកាសយានដ្ឋានអន្តរជាតិបេឡារុសនៃប្រទេសស៊ែប៊ី។ ថ្ងៃដដែល សម្ភារៈវេជ្ជសាស្រ្តដែលរដ្ឋាភិបាលចិនបានផ្តល់ដល់រដ្ឋាភិបាលឥណ្ឌូណេស៊ីបានទៅដល់ក្រុងហ្សាការតា។
កាលពីថ្ងៃទី២៦ខែមីនា ក្រុមអ្នកជំនាញវេជ្ជសាស្រ្តប្រទេសចិនទទួលបន្ទុកជួយគ្រប់គ្រងជំងឺឆ្លងនៅប្រទេសអ៊ីតាលីបានទៅដល់មន្ទីរពេទ្យសកលវិទ្យាល័យ Careggi នៃទីក្រុង Firenze ដើម្បីផ្លាស់ប្តូរព័ត៌មានជាមួយបុគ្គលិកពេទ្យនិងអ្នកជំនាញការពារជំងឺក្នុងតំបន់អំពីការបង្ការនិងគ្រប់គ្រងជំងឺកូវីដ១៩ ព្រមទាំងបានចែករំលែកនូវវិធានការនិងបទពិសោធរបស់ចិនក្នុងការបង្ការ គ្រប់គ្រងនិងការព្យាបាលជំងឺឆ្លង។
កាលពីថ្ងៃទី២៥ខែមីនា វេបសាយនៃបណ្តាញជាតិនៃប្រទេសអ៊ុយក្រែនបានចុះផ្សាយអត្ថបទថ្លែងអំណរគុណចំពោះប្រទេសចិនដោយបានបង្ហាញថា ប្រទេសចិនជាប្រទេសតែមួយគត់ដែលបានផ្តល់សម្ភារៈទប់ទល់នឹងជំងឺឆ្លងដល់ប្រទេសអ៊ុយក្រែន។ ក្រៅពីប្រទេសចិនគ្មានប្រទេសណាមួយបានផ្តល់ជំនួយដល់ប្រទេសអ៊ុយក្រែននោះទេ ក្នុងនោះរួមទាំងសហភាពអឺរ៉ុបនិងអាមេរិកដែលជាប្រទេសជាសម្ព័ន្ធមិត្តរបស់អ៊ុយក្រែន៕