កាលពីថ្ងៃទី ១១ ខែមីនា បន្ទាប់ពីអង្គការសុខភាពពិភពលោកបានប្រកាសថា ជំងឺកូវីដ-19 ជាជំងឺរីករាលដាលជាសកល អង្គការអន្តរជាតិដែលមានទីស្នាក់ការទូទៅនៅក្រុងហ្សឺណេវបាននាំគ្នាបង្កើនវិធានការបង្ការនិងគ្រប់គ្រងព្រមទាំងបានចូលរួមក្នុងសកម្មភាពប្រយុទ្ធប្រឆាំងនឹងជំងឺកូវីដ-19 ទូទាំងពិភពលោក ។
អង្គការពាណិជ្ជកម្មពិភពលោកបានថ្លែងកាលពីថ្ងៃទី ១២ ខែមីនា ថា ដោយរងឥទ្ធិពលពីជំងឺកូវីដ-19 អង្គការនេះទទួលបានលិខិតស្នើសុំពីកាហ្សាក់ស្ថានដើម្បីឱ្យគិតពិចារណាឡើងវិញនូវកាលបរិច្ឆេទធ្វើសន្និសីទថ្នាក់រដ្ឋមន្ត្រីនៃអង្គការពាណិជ្ជកម្មពិភពលោកលើកទី ១២ ដែលពីមុនបានកំណត់ធ្វើនៅខែមិថុនានៅប្រទេសនេះ ។
ថ្ងៃដដែល ក្រុមប្រឹក្សាសិទ្ធិមនុស្សនៃអង្គការសហប្រជាជាតិបានសម្រេចថា ដោយសារជំងឺកូវីដ-19 កំពុងរីករាលដាលយ៉ាងលឿននៅស្វីស សន្និសីទលើកទី ៤៣ របស់ខ្លួនដែលគ្រោងបញ្ចប់នៅថ្ងៃទី ២០ ខែមីនាខាងមុខនេះនឹងត្រូវផ្អាកចាប់ពីថ្ងៃត្រង់ទី ១៣ ខែមីនា ។
តាមការផ្សាយរបស់ប្រព័ន្ធសារព័ត៌មានបានឱ្យដឹងថា ដោយសារមានករណីជាប់សង្ស័យឆ្លងជំងឺកូវីដ-19 សន្និសីទនៃអង្គការសហប្រជាជាតិ ស្តីពីពាណិជ្ជកម្មនិងការអភិវឌ្ឍព្រមទាំងទីស្នាក់ការមូលនិធិកុមារអង្គការសហប្រជាជាតិប្រចាំក្រុងហ្សឺណេវជាដើមក៏បានចាត់វិធានការ ដូចជាលើកទឹកចិត្តឱ្យបុគ្គលិកធ្វើការក្នុងផ្ទះជាដើម ហើយអង្គការអន្តរជាតិមួយចំនួនដែលមានទីស្នាក់ការនៅក្រុងហ្សឺណេវ ក៏បានបង្កើនការពិនិត្យសុខភាព៕
