លោក Emmanuel Macron ប្រធានាធិបតីបារាំងបានថ្លែងសុន្ទរកថាតាមកញ្ចក់ទូរទស្សន៍នាថ្ងៃទី ១២ ខែមីនាដោយបានប្រកាសថា ដោយសារជំងឺកូវីដ ១៩ រាតត្បាតយ៉ាងធ្ងន់ធ្ងរបារាំងនឹងចាប់ផ្តើមប្រើប្រាស់វិធានការបង្ការនិងគ្រប់គ្រងមួយចំនួនដូចជាបិទសាលារៀនជាបណ្តោះអាសន្នជាដើម។ ប៉ុន្តែ ការបោះឆ្នោតភូមិឃុំក្រុងវគ្គទី១ នឹងធ្វើឡើងតាមផែនការដដែល។
លោក Macron បានប្រកាសបន្ថែមថា ចាប់ពីថ្ងៃទី ១៦ ខែមីនាតទៅ បារាំងនឹងបិទសាលារៀននៅទូទាំងប្រទេស ក្នុងនោះរួមទាំងសាលាមត្តេយ្យ។ លោកបានស្នើដល់ប្រជាជនបារាំងទាំងអស់ឱ្យកាត់បន្ថយការធ្វើដំណើរ និងគិតពិចារណាពីការបំពេញការងារពីចម្ងាយ។ លោកក៏បានអំពាវនាវដល់អ្នកដែលងាយឆ្លងជំងឺ ពិសេសមនុស្សចាស់ៗអាយុលើសពី ៧០ ឆ្នាំ និងអ្នកដែលមានជំងឺរ៉ាំរ៉ៃ សូមស្នាក់នៅក្នុងផ្ទះកុំចេញទៅខាងក្រៅ៕