កាលពីថ្ងៃទី ១០ ខែមីនា តាមម៉ោងតំបន់ ប្រទេសចិននិងអង្គការសុខភាពពិភពលោកបានចុះហត្ថលេខាលើកិច្ចព្រមព្រៀងផ្តល់ជំនួយជាផ្លូវការ ដោយរដ្ឋាភិបាលចិននឹងផ្តល់ជំនួយជាទឹកប្រាក់ចំនួន ២០ លានដុល្លារអាមេរិកដល់អង្គការសុខភាពពិភពលោក សម្រាប់គាំទ្រប្រទេសដែលមានប្រព័ន្ធសុខាភិបាលទន់ខ្សោយក្នុងការប្រយុទ្ធប្រឆាំងនឹងជំងឺ Covid-19 ។
បន្ទាប់ពីចុះហត្ថលេខាលើកិច្ចព្រមព្រៀង លោកTedros Adhanom Ghebreyesus ប្រធានអង្គការសុខភាពពិភពលោកបានកោតសរសើររដ្ឋាភិបាលចិនដែលបានពុះពារការលំបាកយ៉ាងខ្លាំងដែលខ្លួនកំពុងប្រឈមមុខដោយបានផ្តល់ជំនួយដល់ប្រទេសកំពុងអភិវឌ្ឍន៍ផ្សេងទៀតបានទាន់ពេលវេលាក្នុងគ្រាដ៍សំខាន់ដែលពិភពលោកទាំងមូលកំពុងប្រយុទ្ធប្រឆាំងនឹងជំងឺ Covid-19 ។
ពេលឆ្លើយសំនួររបស់អ្នកសារព័ត៌មាននៃអគ្គស្ថានីយវិទ្យុនិងទូរទស្សន៍មជ្ឈិមចិន លោកបានថ្លែងថា ប្រឈមមុខនឹងវីរុសប្រភេទថ្មីដែលមិនដឹងអត្តសញ្ញាណ បទពិសោធន៍នៃប្រទេសចិន គឺអាចអនុវត្តបាន ។ ការរីករាលដាលនៃជំងឺ Covid-19 នៅប្រទេសចិនបានបង្ហាញនូវនិន្នាការធ្លាក់ចុះ វីរុសត្រូវបានទប់ស្កាត់ ហើយថ្នាំវ៉ាក់សាំងក៏កំពុងត្រូវបានស្រាវជ្រាវនិងផលិតឡើង ។ ទាំងអស់នេះមកពីសមត្ថភាពដឹកនាំនៃរដ្ឋាភិបាលចិននិងកិច្ចសហប្រតិបត្តិការរបស់ប្រជាជនចិនទាំងមូល ។ ឆន្ទះដ៍មុតមាំរបស់រដ្ឋាភិបាល ការគ្រប់គ្រងខ្លួនឯងរបស់ប្រជាជននិងកិច្ចសហប្រតិបត្តិការដ៏រឹងមាំ គឺជាធាតុដ៍សំខាន់។ បើសិនប្រទេសផ្សេងទៀតអាចធ្វើដូចនេះ ក៏អាចគ្រប់គ្រងជំងឺបាន ។ ប្រទេសចិនបានចាត់វិធានការទ្រង់ទ្រាយធំហើយ ប្រទេសផ្សេងទៀតគួរតែចាប់យកឱកាសបែបនេះ ដើម្បីទប់ស្កាត់ជំងឺនេះឱ្យបានឆាប់បំផុត ៕