កាលពីថ្ងៃទី ១០ ខែមីនា លោកស៊ី ជីនភីង ប្រធានរដ្ឋចិនបានអញ្ជើញចុះទៅក្រុង វូហាន ខេត្តហ៊ូប៉ី ដែលជាសមរភូមិមុខនៃការប្រយុទ្ធប្រឆាំងនឹងជំងឺCOVID-19 ដោយបានដាក់ចេញនូវបទបញ្ជាយ៉ាងម៉ឺងម៉ាត់ ដើម្បីយកឈ្នះលើជំងឺឆ្លងនេះ។ មជ្ឈដ្ឋានមតិបានស្គាល់ជាទូទៅថា ដំណើរទស្សនកិច្ចរបស់លោកស៊ី ជីនភីង លើកនេះមានអត្ថន័យក្រៃលែង ។
មុននេះ អ្នកជំនាញនៃអង្គការសុខភាពពិភពលោកបានថ្លែងថា ការងារបង្ការនិងគ្រប់គ្រងជំងឺCOVID-19នៃប្រទេសចិនជិតដល់ទីបញ្ចប់ហើយ ។
នៅក្នុងរយៈពេលមិនដល់ ២ ខែផង ប្រទេសចិន ដែលជាប្រទេសមួយមានប្រជាជនច្រើនជាងគេបំផុតលើពិភពលោក បានទទួលជោគជ័យក្នុងការទប់ស្កាត់ការរាតត្បាតនៃជំងឺឆ្លង ។ ប្រជាជននៅលើពិភពលោកបានទទួលស្គាល់ជាទូទៅថា នេះជាលទ្ធផលនៃការរួមគ្នាប្រយុទ្ធប្រឆាំងនឹងជំងឺឆ្លងរវាងមេដឹកនាំនិងប្រជាជនចិន ។ លោក Ostrovsky នាយករងនៃវិទ្យាស្ថានស្រាវជ្រាវចុងបូព៌ានៃបណ្ឌិត្យសភាវិទ្យាសាស្ត្ររុស្ស៊ីបានថ្លែងថា នេះបានឆ្លុះបញ្ចាំងពីគោលការណ៍របស់គណបក្សកុម្មុយនិស្តចិន ស្តីពីការតម្កល់អាយុជីវិតនិងសុខភាពរបស់ប្រជាជនក្នុងការប្រយុទ្ធប្រឆាំងនឹងជំងឺឆ្លងជាភារកិច្ចចម្បង ក៍ដូចជាការលើកទឹកចិត្តដល់ប្រជាជនឱ្យបន្តខិតខំប្រឹងប្រែង ដើម្បីយកឈ្នះលើជំងឺឆ្លងនៅទីបំផុត ។
លោក ស៊ី ជីនភីង បានបកស្រាយទស្សនៈគំនិតអភិបាលកិច្ចរបស់ខ្លួនស្តីពី«ការតម្កល់អាយុជីវិតនិងសុខភាពរបស់ប្រជាជនជាភារកិច្ចចម្បង» តាមរយៈសកម្មភាពជាក់ស្តែង ដូចជា ធ្វើជាមេបញ្ជាការ ដើម្បីបញ្ជាផ្ទាល់លើសមរភូមិនៃការប្រយុទ្ធនឹងជំងឺ COVID-19 ព្រមទាំងចុះទៅសមរភូមិជួរមុខផ្ទាល់ចំនួន ៣ លើក ដើម្បីសិក្សាស្វែងយល់និងត្រួតពិនិត្យពីសភាពការណ៍បង្ការនិងគ្រប់គ្រងជំងឺជាដើម។
ក្នុងគ្រាដ៍សំខាន់នៃការប្រយុទ្ធប្រឆាំងនឹងជំងឺ COVID-19 នាពេលបច្ចុប្បន្ននេះ មេដឹកនាំកំពូលរបស់ប្រទេសចិនបានអញ្ជើញចុះទៅទីក្រុងវូហាន ខេត្តហ៊ូប៉ី ដើម្បីសួរសុខទុក្ខប្រជាជននិងពិនិត្យការងារ ។ លោកប្រធានទីភ្នាក់ងារកាសែត «Alwatan» របស់ប្រទេសអូម៉ងបានវាយតម្លៃចំពោះការនេះថា ការអញ្ជើញចុះទៅត្រួតពិនិត្យដោយផ្ទាល់របស់លោកប្រធានរដ្ឋចិន ស៊ី ជីនភីងនៅទីក្រុងវូហាន ខេត្តហ៊ូប៉ី ដែលជាកន្លែងផ្ទុះជំងឺឆ្លងដ៏ធ្ងន់ធ្ងរបំផុតរបស់ចិន បានឆ្លុះបញ្ចាំងឱ្យឃើញនូវមនោសញ្ចេតនា « តម្កល់ប្រជាជនជាសំខាន់»របស់មេដឹកនាំប្រទេសធំ។
នាពេលបច្ចុប្បន្ននេះ ជំងឺ COVID-19 កំពុងរីករាលដាលនៅទូទាំងពិភពលោក។ អង្គការសុខភាពពិភពលោក បានសម្តែងការព្រួយបារម្ភ ចំពោះប្រទេសមួយចំនួន ដែលខ្វះការយកចិត្តទុកដាក់ និងការត្រៀមរៀបចំ ទប់ស្កាត់ជំងឺឆ្លងនេះ។ ជំងឺ COVID-19 លើកនេះបានផ្តល់ឱកាសដល់ប្រទេសនីមួយៗ នៅលើពិភពលោកធ្វើការវាយតម្លៃ ចំពោះការទប់ទល់នឹងជំងឺឆ្លងរបស់ខ្លួន។ លោកTedrosប្រធាននៃអង្គការសុខភាពពិភពលោក បានថ្លែងថា ពេលលោក ធ្វើដំណើរទៅក្រុងប៉េកាំង ដើម្បីសិក្សាស្វែងយល់និងត្រួតពិនិត្យពីសភាពការណ៍នៃជំងឺឆ្លងនេះ លោកបានឃើញលោកប្រធានរដ្ឋចិន ស៊ី ជីនភីង ធ្វើការបញ្ជាដោយផ្ទាល់ លើការងារបង្ការនិងគ្រប់គ្រងជំងឺឆ្លង។ មេដឹកនាំចិន បានបង្ហាញឱ្យឃើញនូវកម្លាំងដឹកនាំនិងឆន្ទៈនយោបាយបែបនេះ គឺស្របតាមការអំពាវនាវរបស់អង្គការសុខភាពពិភពលោករហូតមក។
ដំណើរទស្សនកិច្ចទៅកាន់ទីក្រុងវូហានរបស់លោកស៊ីជីនភីងលើកនេះបានបង្ហាញម្តងទៀតនូវជំនឿចិត្ត ការប្តេជ្ញាចិត្ត និងសមត្ថភាពរបស់ប្រទេសចិនទៅកាន់ពិភពលោក។ រដូវផ្ការីកខិតជិតមកដល់ហើយៗ ជ័យជម្នះរបស់ប្រជាជនចិនលើសមរភូមិនៃជំងឺឆ្លងនេះ ក៍ខិតជិតមកដល់ដែរ៕