បច្ចុប្បន្ននេះ តំបន់នានារបស់ចិនកំពុងបង្ការនិងគ្រប់គ្រងជំងឺឆ្លងផង និងខិតខំប្រឹងប្រែងអភិវឌ្ឍន៍សេដ្ឋកិច្ចផង ។ ជាមួយគ្នានេះ បានបន្តពង្រឹងសេវាកម្មនិងបង្កើនកិច្ចខិតខំប្រឹងប្រែងក្នុងការគាំទ្រឥតឈប់ឈរដល់សហគ្រាស ដើម្បីដំណើរការសង្វាក់ផលិតកម្មក៍ដូចជាបំពេញការងារឡើងវិញប្រកបដោយសណ្តាប់ធ្នាប់ ។
ចាប់តាំងពីដើមខែកុម្ភៈឆ្នាំ២០២០មក ក្រុងសឹនចឹនបានដាក់ចេញនិងអនុវត្តនូវវិធានការគោលនយោបាយចំនួន១៦សម្រាប់គាំទ្រសហគ្រាសឆ្លងកាត់គ្រាលំបាកដើម្បីកាត់បន្ថយសម្ពាធមូលនិធិសហគ្រាសជាង៦០ពាន់លានដុល្លារ ក្នុងនោះមានដូចជា ប្រាក់ជួលអគារ អគ្គិសនី ពន្ធដារនិងប្រាក់ធានាសង្គមជាដើម ដើម្បីផ្តល់ការគាំទ្របន្ថែមទៀតចំពោះដំណើរការផលិតកម្មនិងបំពេញការងារឡើងវិញ ។
សម្រាប់ទីក្រុងសៀងហៃដែលជាមជ្ឈមណ្ឌលសេដ្ឋកិច្ចរបស់ចិន ផ្សារទំនើបបានបើកទ្វារជិត១០០ភាគរយ ។ ហាងលក់ទំនិញធំៗប្រហែល៩៥ភាគរយបានដំណើរការអាជីវកម្មជាប្រក្រតីឡើងវិញ។ ចំណែកហាងលក់តូចៗបានបើកទ្វារ៩១,៤ភាគរយ ។ រីឯសហគ្រាសសំខាន់ៗនៃរបរពាណិជ្ជកម្មអេឡិចត្រូនិកក៍បានដំណើរការឡើងវិញទាំងស្រុងផងដែរ។ ម៉្យាងវិញទៀត ផ្សារលក់កសិផលបោះដុំក៍បានដំណើរការអាជីវកម្មជាថ្មីឡើងវិញទាំងស្រុង ខណៈផ្សារបន្លែដែលបានបើកមានអត្រា៩៧,៨ភាគរយ ។ បច្ចុប្បន្ននេះ ប្រភពទំនិញសម្រាប់ផ្គត់ផ្គង់ដល់ទីផ្សារចំណីអាហារសំខាន់ៗនិងអាហារបន្ទាប់បន្សំនៃក្រុងសៀងហៃគឺគ្រប់គ្រាន់និងសម្បូរបែប៕
