លោកអាបេ ស៊ីនហ្សូ នាយករដ្ឋមន្ត្រីជប៉ុន បានជួបពិភាក្សាការងារជាមួយលោក Yang Jiechi សមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិសចិន និងជាប្រធាននៃគណៈកម្មាធិការកិច្ចការអន្តរជាតិមជ្ឈិមចិននៅក្រុងតូក្យូកាលពីថ្ងៃទី ២៨ ខែកុម្ភៈ ។
ថ្លែងក្នុងកិច្ចជំនួប លោក Yang Jiechi បានបញ្ជាក់ថា ការងារប្រយុទ្ធប្រឆាំងនឹងជំងឺCOVID-19 នៃប្រទេសចិន ទទួលបានលទ្ធផលយ៉ាងលេចធ្លោរ ក្រោមការដឹកនាំដោយផ្ទាល់ពីលោកស៊ី ជីនភីង ប្រធានរដ្ឋចិន ។ ប្រទេសចិន មានជំនឿចិត្តនិងសមត្ថភាពក្នុងការយកឈ្នះលើជងឺឆ្លង ដើម្បីសម្រេចបាននូវគោលដៅអភិវឌ្ឍន៍សេដ្ឋកិច្ចនិងសង្គមឆ្នាំ២០២០ ។ ភាគីចិនសូមថ្លែងអំណរគុណដោយស្មោះអស់ពីដួងចិត្តចំពោះការគាំទ្រដ៏មានតម្លៃរបស់ជប៉ុន ក្នុងការប្រយុទ្ធប្រឆាំងនឹងជំងឺឆ្លងលើកនេះ ។ភាគីចិនមានឆន្ទៈបន្តផ្តល់ការគាំទ្រនិងជំនួយដល់ភាគីជប៉ុន ឱ្យអស់ពីសមត្ថភាព ក្នុងការប្រយុទ្ធប្រឆាំងនឹងជំងឺឆ្លង ។ ទំនាក់ទំនងរវាងចិននិងជប៉ុន នាពេលបច្ចុប្បន្ននេះ បានរក្សានិន្នាការអភិវឌ្ឍន៍ដ៏ល្អប្រសើរ ។ ដំណើរទស្សនកិច្ចផ្លូវរដ្ឋរបស់លោកស៊ីជីនភីងប្រធានរដ្ឋចិន នៅប្រទេសជប៉ុនគឺមានសារៈសំខាន់យ៉ាងក្រៃលែង ។ ភាគីចិនរីករាយរួមសហការជាមួយភាគីជប៉ុន ដើម្បីធ្វើការងារត្រៀមរៀបចំឱ្យបានល្អ ។ ភាគីចិន គាំទ្រយ៉ាងមុតមាំដល់ការរៀបចំធ្វើព្រឹត្តិការណ៍កីឡាអូឡាំពិកក្រុងតូត្យូ ប្រទេសជប៉ុន ។
ជាការឆ្លើយតប លោកអាបេ ស៊ីនហ្សូបានថ្លែងថា ដំណើរទស្សនកិច្ចផ្លូវរដ្ឋរបស់លោកប្រធានរដ្ឋចិនស៊ី ជីនភីងនៅប្រទេសជប៉ុនឆ្នាំនេះ គឺមានសារៈសំខាន់យ៉ាងក្រៃលែង ។ ភាគីជប៉ុន នឹងធ្វើការងារត្រៀមរៀបចំ យ៉ាងផ្ចិតផ្ចង់ ដើម្បីធានាឱ្យដំណើរទស្សនកិច្ចនេះទទួលបានភាពជោគជ័យនិងប្រកបដោយផ្លែផ្កា ។ ភាគីជប៉ុនសូមវាយតម្លៃខ្ពស់ ចំពោះលទ្ធផលនៃការប្រយុទ្ធប្រឆាំងនឹងជំងឺឆ្លងរបស់ចិន ហើយរីករាយបង្កើនកិច្ចសហប្រតិបត្តិការនិងការផ្លាស់ប្តូរជាមួយភាគីចិន ដើម្បីបញ្ចេញសញ្ញាវិជ្ជមាន ដល់សហគមន៍អន្តរជាតិ ក្នុងការរួមសហការគ្នាដើម្បីទប់ទល់នឹងបញ្ហាប្រឈមផ្នែកសន្តិសុខសុខាភិបាលអន្តរជាតិ៕