កាលពីថ្ងៃទី ២៧ ខែកុម្ភៈ តាមម៉ោងនៅក្នុងតំបន់ កិច្ចប្រជុំលើកទី ៥៣ នៃក្រុមប្រឹក្សារដ្ឋមន្រ្តីក្រសួងសុខាភិបាលនៃបណ្តាប្រទេសសម្ព័ន្ធអារ៉ាប់ត្រូវបានធ្វើឡើងនៅក្នុងទីស្នាក់ការទូទៅនៃសម្ព័ន្ធអារ៉ាប់នៅទីក្រុងគែរ រដ្ឋធានីប្រទេសអេហ្ស៊ីប។ប្រធានបទនៃកិច្ចប្រជុំនេះ គឺ របៀបសម្របសម្រួលយន្តការដើម្បីរួមគ្នាទប់ស្កាត់នឹងការរីករាលដាលនៃជំងឺ Covid-19 នៅក្នុងតំបន់។
បន្ទាប់ពីបញ្ចប់កិច្ចប្រជុំនេះ សេចក្តីថ្លែងការណ៍រួមមួយដែលត្រូវបានចេញផ្សាយដោយក្រុមប្រឹក្សារដ្ឋមន្រ្តីក្រសួងសុខាភិបាលនៃបណ្តាប្រទេសសម្ព័ន្ធអារ៉ាប់។សេចក្តីថ្លែងការណ៍រួមនេះបានធ្វើការវាយតម្លៃខ្ពស់ចំពោះកិច្ចខិតខំប្រឹងប្រែងរបស់ប្រទេសចិនក្នុងការប្រយុទ្ធប្រឆាំងនឹងការរីករាលដាលនៃជំងឺនេះ។ជាមួយគ្នានេះ បានសម្តែងការកោតសរសើរនិងគាំទ្រចំពោះវិធានការបង្ការរបស់ចិនក្នុងការទប់ស្កាត់នឹងការរីករាលដាលនៃជំងឺ Covid-19 ព្រមទាំងឥរិយាបថបើកទូលាយនិងតម្លាភាពក្នុងការដោះស្រាយបញ្ហានៃជំងឺនេះ។លើសពីនេះទៀត សេចក្តីថ្លែងការណ៍រួមក៏បានសង្កត់ធ្ងន់ថា សម្ព័ន្ធអារ៉ាប់នឹងរួមសហការជាមួយប្រទេសចិនដើម្បីប្រយុទ្ធប្រឆាំងនឹងការរាតត្បាតនៃជំងឺនេះ ហើយជឿជាក់ថា ប្រទេសចិនមានសមត្ថភាពជួយបណ្តាប្រទេសដទៃទៀតនៅលើពិភពលោកក្នុងការទប់ស្កាត់នឹងការរីករាលដាលនៃជំងឺនេះដោយជោគជ័យ៕