កាលពីថ្ងៃទី ២៤ ខែកុម្ភៈ លោក Zhao Lijian អ្នកនាំពាក្យអាណត្តិថ្មីនៃក្រសួងការបរទេសចិនបានបង្ហាញមុខនិងធ្វើជាអធិបតីនៃសន្និសីទសារព័ត៌មានជាប្រចាំនាថ្ងៃដដែលនេះ។សំដៅចំពោះកិច្ចប្រជុំពិសេសថ្នាក់រដ្ឋមន្រ្តីក្រសួងការបរទេសរវាងចិននិងអាស៊ានស្តីពីជំងឺ Covid-19 ដែលបានប្រារព្ធឡើងកាលពីសប្តាហ៍មុនបានទទួលការឆ្លើយតបយ៉ាងកក់ក្តៅពីសហគមន៍អន្តរជាតិ ខណៈរដ្ឋមន្រ្តីក្រសួងការបរទេសនៃបណ្តាប្រទេសអាស៊ានមួយចំនួនបានសម្តែងការកោតសរសើរចំពោះវិធានការរបស់ប្រទេសចិនក្នុងការបង្ការនិងគ្រប់គ្រងជំងឺនេះ ។លោក Zhao Lijian បានថែ្លងថា ប្រទេសចិនមានឆន្ទៈរួមសហការជាមួយភាគីពាក់ព័ន្ធទាំងអស់ រួមទាំង អាស៊ានផងដែរដើម្បីចូលរួមវិភាគទានរបស់ខ្លួនដល់បុព្វហេតុសុខភាពសាធារណៈក្នុងតំបន់និងអន្តរជាតិ។
លោក Zhao Lijian បានចង្អុលបង្ហាញថា កិច្ចប្រជុំពិសេសថ្នាក់រដ្ឋមន្រ្តីក្រសួងការបរទេសរវាងចិននិងអាស៊ានស្តីពីជំងឺ Covid-19 ដែលបានប្រារព្ធឡើងនៅទីក្រុងវៀងចន្ទន័ប្រទេសឡាវកាលពីសប្តាហ៍មុន គឺជាកិច្ចប្រជុំថ្នាក់រដ្ឋមន្រ្តីក្រសួងការបរទេសពហុភាគីដំបូងបង្អស់ដែលផ្តោតសំខាន់ទៅលើសុវត្ថិភាពសុខភាពសាធារណៈបន្ទាប់ពីផ្ទុះនូវជំងឺនេះនិងបានបង្កើតជាគំរូសម្រាប់បណ្តាប្រទេសនានាក្នុងតំបន់ដើម្បីពួតដៃគ្នាទប់ស្កាត់នឹងករណីអាសន្នផ្នែកសុខភាពសាធារណៈនាពេលអនាគត៕