កាលពីថ្ងៃទី២៤ខែកុម្ភៈ លោក Tedros Adhanom Ghebreyesus អគ្គលេខាធិការអង្គការសុខភាពពិភពលោកបានគូសបញ្ជាក់ថា ទោះបីប្រទេសអ៊ីតាលី អ៊ីរ៉ង់និងកូរ៉េខាងត្បូង មានអ្នកឆ្លង COVID-19 កើនឡើង គួរឱ្យព្រួយបារម្ភ ប៉ុន្តែបច្ចុប្បន្ននេះ ជំងឺនេះនៅតែមិនទាន់ក្លាយជាជំងឺរាតត្បាតធ្ងន់ធ្ងរនោះទេ ។
លោក Tedros Adhanom Ghebreyesus បានថ្លែងក្នុងសន្និសីទសារព័ត៌មានជាប្រចាំនៃអង្គការសុខភាពពិភពលោកថា ការប្រើប្រាស់ពាក្យ“ជំងឺរាតត្បាតធ្ងន់ធ្ងរ”អង្គការសុខភាពពិភពលោក ត្រូវធ្វើការវិនិច្ឆ័យ និងវាយតម្លៃទៅលើក្របខ័ណ្ឌភូមិសាស្ត្រនៃការរាលដាលនៃវីរុស ព្រមទាំងកម្រិតនៃជំងឺឆ្លងនេះ ក៍ដូចជា ផលប៉ះពាល់ដល់សង្គមទាំងមូលជាដើម។
បច្ចុប្បន្ននេះ អង្គការសុខភាពពិភពលោក មិនទាន់ឃើញ COVID-19 រាតត្បាតដោយគ្មានការគ្រប់គ្រងបាន នៅទូទាំងពិភពលោក នោះទេ ហើយក៏មិនទាន់ឃើញអត្រាអ្នកជំងឺធ្ងន់ធ្ងរ ឬអ្នកស្លាប់ ក្នុងទ្រង់ទ្រាយធំនោះដែរ ។
ព្រមពេលជាមួយគ្នានេះ លោក Tedros Adhanom Ghebreyesus បានបង្ហាញថា អង្គការសុខភាពពិភពលោក នឹងបន្តធ្វើការវាយតម្លៃហានិភ័យ ដើម្បីពិនិត្យលើវឌ្ឍនភាពនិង បម្រែបម្រួលនៃជំងឺឆ្លងនេះ នៅគ្រប់ពេលវេលា ៕