ថ្ងៃទី១៩ខែកុម្ភៈ នៅក្រុងវៀងចន្ទន៍នៃប្រទេសឡាវ លោកវ៉ាងអ៊ីសមាជិកក្រុមប្រឹក្សាកិច្ចការរដ្ឋនិងជារដ្ឋមន្រ្តីការបរទេសចិនបានអញ្ជើញចូលរួមពិធីលៀងសាយភោជន៍សម្រាប់សន្និសីទវិសាមញ្ញរដ្ឋមន្រ្តីការបរទេសចិន-អាស៊ាននិងសន្និសីទរដ្ឋមន្រ្តីការបរទេសលើកទី៥ស្តីពីកិច្ចសហប្រតិបត្តិការឡានឆាង-មេគង្គដែលរៀបចំឡើងដោយរដ្ឋមន្រ្តីការបរទេសឡាវ ព្រមទាំងបានថ្លែងសុន្ទរកថា។
ថ្លែងក្នុងពិធីលៀងសាយភោជន៍ លោកវ៉ាងអ៊ីបានលើកឡើងថា ឆ្លងតាមរយៈការខិតខំប្រឹងប្រែងដ៏លំបាកលំបិន សភាពការណ៍ឆ្លងនៃជំងឺរលាកសួតបង្កដោយវីរុសកូរ៉ូណាថ្មីកំពុងកើតមានការប្រែប្រួល យើងខ្ញុំមានជំនឿចិត្ត ហើយក៏ច្បាស់ជានឹងអាចយកឈ្នះលើជំងឺឆ្លងនេះក្នុងពេលឆាប់ៗជាមិនខាន។
លោកវ៉ាងអ៊ីបានថ្លែងទៀតថា ចិននិងអាស៊ានមានភាពជិតស្និទ្ធដូចមនុស្សក្នុងគ្រួសារតែមួយ ពោលគឺសហគមន៍រួមវាសនាតែមួយ។មនោសញ្ចេតនាមេត្រីភាពមកពីអាស៊ាននិងសហគមន៍អន្តរជាតិធ្វើឱ្យយើងខ្ញុំមានជំនឿចិត្តកាន់តែខ្លាំងក្នុងការយកឈ្នះលើជំងឺរលាកសួតបង្កដោយវីរុសកូរ៉ូណាថ្មី ហើយធ្វើឱ្យយើងខ្ញុំទទួលបានអារម្មណ៍ថា រដូវរងាឆ្នាំនេះមិនសូវរងាខ្លាំងនោះទេ រដូវផ្ការីកនឹងចូលមកដល់ក្នុងពេលឆាប់ៗ ។ ខ្ញុំជឿជាក់ថា បន្ទាប់ពីឆ្លងកាត់ការប្រឈមបណ្តាលមកពីករណីជំងឺឆ្លងលើកនេះ ទំនាក់ទំនងរវាងចិននិងអាស៊ាន ក៏ដូចជាទំនាក់ទំនងរវាងចិននិងប្រទេសជាសមាជិកអាស៊ាននានាពិតជានឹងត្រូវពង្រឹងនិងពង្រីកថែមមួយកម្រិតទៀតជាមិនខាន៕