រសៀលថ្ងៃទី១៨ ខែកុម្ភៈ លោក ស៊ី ជីនភីង ប្រធានរដ្ឋចិនបានជួបពិភាក្សាតាមទូរស័ព្ទជាមួយលោក Macron ប្រធានាធិបតីបារាំងតាមការណាត់ ។ លោក ស៊ី ជីនភីង បានថ្លែងថា ខណៈពេលជាគន្លឹះដែលប្រទេសចិនប្រយុទ្ធប្រឆាំងនឹងសភាពការណ៍ឆ្លងនៃជំងឺរលាកសួតបង្កដោយវីរុសកូរ៉ូណាថ្មី លោកប្រធានាធិបតីបានទាក់ទងតាមទូរស័ព្ទម្តងទៀតដើម្បីសម្តែងការសួរសុខទុក្ខនិងការគាំទ្រដល់ប្រទេសចិន ប្រការនេះបានបង្ហាញយ៉ាងពេញលេញនូវចំណងមិត្តភាពយ៉ាងជ្រាលជ្រៅរវាងប្រទេសទាំងពីរចិននិងបារាំង និងកម្រិតខ្ពស់នៃទំនាក់ទំនងភាពជាដៃគូយុទ្ធសាស្ត្រដោយគ្រប់ជ្រុងជ្រោយរវាងចិននិងបារាំង ក៏ដូចជាការយកចិត្តទុកដាក់ខ្ពស់របស់លោកចំពោះប្រទេសចិននិងទំនាក់ទំនងរវាងចិននិងបារាំងផងដែរ ។ ខ្ញុំសូមថ្លែងអំណរគុណនិងកោតសរសើរចំពោះការនេះ ។
ថ្លែងក្នុងទូរស័ព្ទ លោក ស៊ី ជីនភីង បានគូសបញ្ជាក់ថា បន្ទាប់ពីផ្ទុះសភាពការណ៍ជំងឺឆ្លង ប្រទេសចិនបានធ្វើការរៀបចំចាត់ចែងដោយគ្រប់ជ្រុងជ្រោយ ប្រជាជនចិនទាំងមូលបានសាមគ្គីគ្នាជាធ្លុងមួយ ដើម្បីប្រយុទ្ធប្រឆាំងនឹងសភាពការណ៍ជំងឺឆ្លង ។ ប្រទេសចិនមានសមត្ថភាពប្រមូលផ្តុំប្រជាជននិងមានកម្លាំងជាតិចម្រុះដ៏ខ្លាំងក្លា ហើយក៏មានបទពិសោធន៍ទប់ទល់នឹងភាពអាសន្នសុខាភិបាលសាធារណៈ ដូច្នេះប្រទេសចិនពិតជានឹងយកជ័យជម្នះលើការប្រយុទ្ធប្រឆាំងនឹងសភាពការណ៍ជំងឺឆ្លងលើកនេះជាមិនខាន ។
ជាការឆ្លើយតប លោក Macron ប្រធានាធិបតីបារាំងបានផ្តល់ការគាំទ្រនិងការលើកទឹកចិត្តម្តងទៀតចំពោះរដ្ឋាភិបាលនិងប្រជាជនចិនដែលកំពុងធ្វើកិច្ចខិតខំប្រឹងប្រែងក្នុងការប្រយុទ្ធប្រឆាំងនឹងជំងឺរលាកសួតបង្កដោយវីរុសកូរ៉ូណាថ្មី ។ ភាគីបារាំងរីករាយរួមសហការជាមួយប្រទេសចិនក្នុងការប្រយុទ្ធប្រឆាំងនឹងសភាពការណ៍ជំងឺឆ្លងលើកនេះ ព្រមនិងចាត់ទុកប្រការនេះជាកាលានុវត្តភាព ដើម្បីបង្កើនកិច្ចសហប្រតិបត្តិការផ្នែកសុខភិបាលជាមួយប្រទេសចិន ៕
