លោក Antonio Guterres អគ្គលេខាធិការអង្គការសហប្រជាជាតិបានថែ្លងនៅក្នុងទីក្រុងអាត់ឌីសអាបាបា រដ្ឋធានីនៃប្រទេសអេត្យូពីថា ប្រឈមនឹងការរីករាលដាលនៃជំងឺរលាកសួតបង្កដោយវីរុសកូរ៉ូណាប្រភេទថ្មី សហគមន៍អន្តរជាតិគួរតែពង្រឹងកិច្ចសហប្រតិបត្តិការនិងលុបបំបាត់ការមើលងាយព្រមទាំងផ្តល់ជំនួយដល់ប្រទេសចិនដើម្បីយកជ័យជម្នះលើសង្រ្គាមប្រយុទ្ធប្រឆាំងនឹងការរាតត្បាតនៃជំងឺនេះ។
លោក Antonio Guterres បានថែ្លងថា ប្រទេសចិនបានធ្វើកិច្ចខិតខំប្រឹងប្រែងយ៉ាងខ្លាំងដើម្បីប្រយុទ្ធប្រឆាំងនឹងការរីករាលដាលនៃជំងឺរលាកសួតបង្កដោយវីរុសកូរ៉ូណាប្រភេទថ្មីនិងទប់ស្កាត់ការរីករាលដាលនៃជំងឺនេះប្រកបដោយប្រសិទ្ធភាព ហើយទទួលបាននូវលទ្ធផលគួរឱ្យកត់សម្គាល់។លោកជឿជាក់ថា ប្រឈមមុខនឹងស្ថានភាពដ៏ធ្ងន់ធ្ងរនេះ សហគមន៍អន្តរជាតិចាំបាច់ត្រូវតែពង្រឹងសាមគ្គីភាពនិងកិច្ចសហប្រតិបត្តិការ។បុគ្គលិករបស់អង្គការសហប្រជាជាតិនឹងបន្តធ្វើដំណើរទៅកាន់ប្រទេសចិនតាមសេចក្តីត្រូវការខណៈពេលចាត់វិធានការការពារចាំបាច់ដើម្បីទប់ស្កាត់នឹងការរីករាលដាលនៃជំងឺនេះ។
លោក Antonio Guterres បានសង្កត់ធ្ងន់ថា ក្នុងដំណើរការនៃការប្រយុទ្ធប្រឆាំងនឹងការរាតត្បាតនៃជំងឺនេះ ភាគីពាក់ព័ន្ធទាំងអស់គួរតែប្រកាន់ខ្ជាប់នូវស្មារតីមនុស្សធម៌ លុបបំបាត់ឥរិយាបថមើលងាយគ្រប់ទម្រង់ដើម្បីរួមគ្នាជួយប្រទេសចិនក្នុងការយកជ័យជម្នះលើសង្រ្គាមប្រយុទ្ធប្រឆាំងនឹងជំងឺនេះក្នុងពេលឆាប់ៗនេះ៕