លោកLian Weiliang អនុប្រធានគណៈកម្មាធិការកំណែទម្រង់និងការអភិវឌ្ឍជាតិចិនបានថ្លែងនៅថ្ងៃទី ៣ ខែកុម្ភៈនាក្រុងប៉េកាំងថា ផលប៉ះពាល់របស់ជំងឺរលាកសួតបង្កដោយវីរុសកូរ៉ូណាប្រភេទថ្មីទៅលើសេដ្ឋកិច្ចចិនគឺអាស្រ័យទៅលើវឌ្ឍនភាពនិងប្រសិទ្ធភាពនៃការបង្ការនិងគ្រប់គ្រងជំងឺ ។ ផលប៉ះពាល់នេះគឺមានដំណាក់កាលនិងជាបណ្តោះអាសន្ន ហើយវានឹងមិនផ្លាស់ប្តូរមូលដ្ឋានគ្រឹះនៃសេដ្ឋកិច្ចចិនដែលឆ្ពោះទៅភាពល្អប្រសើរក្នុងរយៈពេលយូរនោះទេ ។
ពេលឆ្លើយនឹងសំណួររបស់អ្នកសារព័ត៌មាននៅក្នុងសន្និសីទព័ត៌មាននៃការិយាល័យព័ត៌មាននៃក្រុមប្រឹក្សាកិច្ចការរដ្ឋចិននាថ្ងៃដដែល លោកLian Weiliangបានថ្លែងថា បច្ចុប្បន្ន កម្លាំងជាក់ស្តែងផ្នែកសេដ្ឋកិច្ច មូលដ្ឋានសម្ភារៈនិងសមត្ថភាពទប់ទល់ចំពោះភាពអាសន្នរបស់ប្រទេសចិនបានកើនឡើងយ៉ាងច្បាស់លាស់ ។ ប្រទេសចិនមានសមត្ថភាពនិងជំនឿចិត្តយកជ័យជម្នះលើសង្គ្រាមប្រយុទ្ធប្រឆាំងនឹងជំងឺនេះ ហើយក៏មានសមត្ថភាពនិងជំនឿចិត្តក្នុងការកាត់បន្ថយផលប៉ះពាល់លើសេដ្ឋកិច្ចឱ្យដល់កម្រិតអប្បបរមា ៕