កាលពីថ្ងៃទី ២ ខែកុម្ភៈ លោក LiKeqiang សមាជិកអចិន្ត្រៃយ៍នៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន នាយករដ្ឋមន្រ្តីនិងជាប្រធាននៃក្រុមដឹកនាំការងារមជ្ឈិមបក្សកុម្មុយនិស្តចិនស្តីពីការបង្ការនិងគ្រប់គ្រងការរាតត្បាតនៃជំងឺរលាកសួត បង្កដោយវីរុសកូរ៉ូណាប្រភេទថ្មី បានធ្វើជាអធិបតីនៃសន្និសីទក្រុមដឹកនាំការងារដើម្បីចាត់ចែងការងារទប់ស្កាត់ការរាតត្បាតជំងឺរលាកសួតបង្កដោយវីរុសកូរ៉ូណាប្រភេទថ្មីនិងការធានាផ្គត់ផ្គង់សម្ភារៈសម្រាប់ទីផ្សារ បង្កើនការការគាំទ្រផ្តល់សម្ភារៈផ្នែកវេជ្ជសាស្រ្តសម្រាប់បង្ការនិងគ្រប់គ្រងជំងឺឆ្លងដល់ខេត្តHuBeiជាពិសេសគឺទីក្រុងWuHanនិងតំបន់សំខាន់ៗដែលនៅជុំវិញ។
សន្និសីទនេះបានចង្អុលបង្ហាញថា គ្រប់តំបន់នានា ត្រូវតែធានាយ៉ាងជាក់លាក់នូវស្ថិរភាពនៃការផ្គត់ផ្គង់សម្ភារៈសម្រាប់បង្ការនិងគ្រប់គ្រងជំងឺឆ្លងនិងសម្ភារៈប្រើប្រាស់ចាំបាច់ក្នុងជីវភាពរស់នៅប្រចាំថ្ងៃ។ ស្វែងយល់ ឱ្យបានទាន់ពេលវេលានិងត្រឹមត្រូវពីសភាពការណ៍ផ្គត់ផ្គង់និងតម្រូវការនៃសម្ភារៈសម្រាប់បង្ការនិងគ្រប់គ្រងជំងឺឆ្លងដូចជាឱសថ សម្ភារៈនិងឧបករណ៍ការពារនិងសម្លាប់មេរោគជាដើម។ ចាត់វិធានការយ៉ាងខ្លាំងក្នុងការគាំទ្រសហគ្រាសមានពាក់ព័ន្ធ ដើម្បីដំណើរការផលិតកម្មឱ្យបានឆាប់ និងពង្រីកផលិតភាព។
សន្និសីទនេះបានបង្ហាញថា ការធានាឆ្លើយតបនឹងតម្រូវការនៃសម្ភារៈសម្រាប់បង្ការនិងគ្រប់គ្រងជំងឺឆ្លងនៃខេត្តHuBei ជាពិសេសគឺទីក្រុងWuHanជាការសំខាន់បំផុត។ ធានាជាអាទិភាពនូវតម្រូវការរបស់ទីក្រុងWuHanនិងតំបន់សំខាន់ៗផ្សេងទៀតនៃខេត្តHuBei។
ត្រូវប្រញាប់ផ្គត់ផ្គង់សម្ភារៈវេជ្ជសាស្រ្តសំខាន់ៗ សម្រាប់បង្ការនិងគ្រប់គ្រងជំងឺឆ្លង ដែលកំពុងខ្វះខាតនៅខេត្តHuBei ដូចជា ម៉ាសនិងសម្លៀកបំពាក់ការពារ ជាដើម៕
