កាលពីរសៀលថ្ងៃទី ១ ខែកុម្ភៈ លោក Deng Xijun ឯកអគ្គរដ្ឋទូតចិនប្រចាំនៅអាស៊ានបានជួបពិភាក្សាការងារជាមួយលោក Kung Phoak អគ្គលេខាធិការរងនៃសមាគមអាស៊ាននៅទីក្រុងហ្សារកាតានៃប្រទេសឥណ្ឌូណេស៊ី។
លោក Deng Xijun បានថែ្លងថា ចាប់តាំងពីផ្ទុះនូវជំងឺរលាកសួតបង្កដោយវីរុសកូរ៉ូណាប្រភេទថ្មីកន្លងមក រដ្ឋាភិបាលចិនបានចាត់វិធានការបង្ការនិងគ្រប់គ្រងយ៉ាងឆាប់រហ័ស ប្រកបដោយគ្រប់ជ្រុងជ្រោយនិងមានប្រសិទ្ធភាពក្នុងការបង្ការនិងគ្រប់គ្រងការរាតត្បាតនៃជំងឺនេះ។ប្រទេសចិនតែងតែធ្វើកិច្ចសហប្រតិបត្តិការអន្តរជាតិដោយប្រកាន់ខ្ជាប់នូវអាកប្បកិរិយាបើកទូលាយ តម្លាភាពនិងទទួលខុសត្រូវ។ឥរិយាបថនិងការអនុវត្តប្រកបដោយទំនួលខុសត្រូវរបស់ប្រទេសចិនទទួលបានការគាំទ្រយ៉ាងពេញលេញដោយអង្គការសុខភាពពិភពលោកនិងបណ្តាប្រទេសដទៃទៀត។
លោក Deng Xijun បានសង្កត់ធ្ងន់ថា នាពេលថ្មីៗនេះ អង្គការសុខភាពពិភពលោកបានប្រកាសថា ជំងឺរលាកសួតបង្កដោយវីរុសកូរ៉ូណាប្រភេទថ្មីបានក្លាយជា“ករណីភាពអាសន្នផ្នែកសុខភាពសាធារណៈធ្វើឱ្យសហគមន៍អន្តរជាតិព្រួយបារម្ភ”ដែលមិនមែនមានន័យថា ជាការបោះឆ្នោតមិនផ្តល់សេចក្តីទុកចិត្តលើប្រទេសចិននោះទេ។ផ្ទុយទៅវិញ អង្គការសុខភាពពិភពលោកពោរពេញទៅដោយទំនុកចិត្តលើសមត្ថភាពនិងការងាររបស់ចិនក្នុងការបង្ការនិងគ្រប់គ្រងការរាតត្បាតនៃជំងឺនេះ។
លោក Deng Xijun រំពឹងថា លោកនឹងរួមសហការយ៉ាងជិតស្និទ្ធជាមួយអាស៊ានដើម្បីរួមគ្នាយកជ័យជម្នះលើសង្រ្គាមប្រយុទ្ធប្រឆាំងនឹងការរីករាលដាលនៃជំងឺរលាកសួតបង្កដោយវីរុសកូរ៉ូណាប្រភេទថ្មីនិងកាត់បន្ថយផលប៉ះពាល់អវិជ្ជមាននៃជំងឺនេះទៅលើសេដ្ឋកិច្ចនិងប្រជាជននៃប្រទេសទាំងពីរឱ្យដល់កម្រិតអប្បបរមាបំផុត។
លោក Kung Phoak បានថែ្លងថា អាស៊ានកោតសរសើរចំពោះការប្តេជ្ញាចិត្តនយោបាយនិងសមត្ថភាពរបស់រដ្ឋាភិបាលចិនក្នុងការទប់ស្កាត់នឹងការរាតត្បាតនៃជំងឺនេះ។
អាស៊ាននឹងពង្រឹងកិច្ចសហប្រតិបត្តិការពហុភាគីនិងទ្វេភាគីជាមួយប្រទេសចិនក្នុងការទប់ស្កាត់នឹងការរាតត្បាតនៃជំងឺនេះ ហើយពួតដៃគ្នាយកជ័យជម្នះលើសង្រ្គាមប្រយុទ្ធប្រឆាំងនឹងការរីករាលដាលនៃជំងឺរលាកសួតបង្កដោយវីរុសកូរ៉ូណាប្រភេទថ្មី៕