ខណៈពេលជិតបញ្ចប់ថ្ងៃឈប់សម្រាកដើម្បីអបរអរសាទរបុណ្យចូលឆ្នាំថ្មីប្រពៃណីចិន ហើយមានអ្នកដំណើរកាន់តែច្រើនឡើងៗធ្វើដំណើរវិលត្រឡប់នៅកន្លែងការងារវិញ ក្រសួងគមនាគមន៍និងដឹកជញ្ជូន ព្រមទាំងស្ថាប័នផ្លូវដែកនិងអាកាសចរណ៍ស៊ីវិលនៃប្រទេសចិនបានដាក់ចេញនូវវិធានការជាច្រើនដើម្បីទប់ស្កាត់ការឆ្លងជំងឺរលាកសួតប្រភេទថ្មីបង្កដោយវីរុសកូរ៉ូណានៅក្នុងរថយន្ត រថភ្លើងនិងយន្តហោះ ។
ថ្លែងក្នុងសន្និសីទកាសែតនៃគណៈកម្មាធិការសុខាភិបាលជាតិចិនកាលពីថ្ងៃទី ៣០ ខែមករា លោកWu Chungeng អ្នកនាំពាក្យនៃក្រសួងគមនាគមន៍និងដឹកជញ្ជូនចិនបានថ្លែងថា ក្រសួងគមនាគមន៍និងដឹកជញ្ជូនចិននឹងបន្តអនុវត្តជាក់ស្តែងនូវការសម្លាប់មេរោគនិងការបើកបង្គួចឱ្យខ្យល់ចេញចូលនៅក្នុងរថយន្ត ព្រមទាំងសហការជាមួយស្ថាប័នសុខាភិបាលជាដើមដើម្បីធ្វើការបង្កើតប៉ុស្តិ៍ពិនិត្យជំងឺនិងស្ទង់កម្តៅក្នុងខ្លួនរបស់អ្នកដំណើរនៅស្ថានីយរថយន្ត ។
ក្រៅពីនេះ ស្ថាប័នផ្លូវដែកនិងអាកាសចរណ៍ស៊ីវិលចិនបានដាក់ចេញនូវផែនការដោះស្រាយជាបន្ទាន់យ៉ាងច្បាស់លាស់ មួយគឺ នៅពេលរកឃើញអ្នកដំណើរមានអាការរោគក្តៅខ្លួននៅក្នុងរថភ្លើងឬយន្តហោះ នឹងចាប់ដំណើរការភ្លាមៗនូវនីតិវិធី ដូចជាឱ្យអ្នកជំងឺនៅដោយឡែកពីគ្នានឹងអ្នកដទៃនិងសម្លាប់មេរោគ ព្រមទាំងរាយការណ៍ជូនស្ថានីយរថភ្លើងចំណតខាងមុខទៀតនិងព្រលានយន្តហោះ ដើម្បីធ្វើការងារត្រៀមសម្រាប់ការផ្ទេរអ្នកជំងឺ ។