តាមដំណឹងនៃគណៈប្រតិភូចិនប្រចាំជាអចិន្ត្រៃយ៍នៅអង្គការសហប្រជាជាតិឱ្យដឹងថា ថ្ងៃទី ២៧ ខែមករា តាមម៉ោងក្នុងតំបន់ លោក Zhang Jun ឯកអគ្គរដ្ឋទូតចិនប្រចាំជាអចិន្ត្រៃយ៍នៅអង្គការសហប្រជាជាតិបានជួបពិភាក្សាជាមួយលោក Guteres អគ្គលេខាធិការអង្គការសហប្រជាជាតិ ដោយបានឧទេ្ទសនាមពីសភាពការណ៍និងការងារពាក់ព័ន្ធរបស់ប្រទេសចិនក្នុងការបង្ការនិងគ្រប់គ្រងសភាពជំងឺរលាកសួតបង្កឡើងដោយវីរុសកូរ៉ូណាថ្មី ។
ជាការឆ្លើយតប លោក Guteres បានថ្លែងថា ក្នុងគ្រាជាគន្លឹះនេះ អង្គការសហប្រជាជាតិនឹងឈរជាមួយរដ្ឋាភិបាលនិងប្រជាជនចិនយ៉ាងមុតមាំ ។អង្គការសហប្រជាជាតិសូមកោតសរសើរចំពោះការខិតខំប្រឹងប្រែងរបស់ប្រទេសចិន ហើយរីករាយផ្តល់ការគាំទ្រនិងជំនួយតាមលទ្ធភាពដល់ប្រទេសចិន ៕