កាលពីថ្ងៃទី៩ខែវិចិ្ឆកា វិទ្យុអន្តរជាតិចិនបានចេញផ្សាយបទអត្ថាធិប្បាយក្រោមចំណងជើងថា “ពិព័រណ៍នាំចូលចិនអន្តរជាតិបង្ហាញយ៉ាងពេញលេញនូវភាពទាក់ទាញធំបួននៃទីផ្សារប្រទេសចិន” ។
អត្ថបទថ្លែងថា ពាណិជ្ជករពិភពលោកដែលចូលរួមពិព័រណ៍នេះ បានបង្ហាញផលិតផលដែលថ្មីបំផុត ល្អបំផុតនិងមានកម្លាំងប្រកួតប្រជែងខ្លាំងបំផុតរបស់ខ្លួន ចូលក្នុងទីផ្សារចិនយ៉ាងពេញទំហឹង ។ នេះបានបង្ហាញពីភាពទាក់ទាញធំបួនរបស់ទីផ្សារប្រទេសចិន គឺ សេចក្តីត្រូវការក្នុងការប្រើប្រាស់ដ៏ច្រើនអនេកដែលកើតចេញពីកំណើននៃការប្រើប្រាស់នៃអតិថិជនចិនចំនួន១ពាន់៤រយលាននាក់ មូលដ្ឋានដ៏រឹងមាំនៃហេដ្ឋារចនាសម្ព័ន្ធនិងប្រព័ន្ធចរាចរណ៍ទំនិញដ៏ខ្លាំងក្លា បរិយាកាសពាណិជ្ជកម្មដែលប្រសើរឡើងឥតឈប់ឈរនិងធនធានច្នៃប្រឌិតថ្មីដ៏សម្បូរបែបដោយផ្តោតលើភាពច្នៃប្រឌិតថ្មីខាងវិទ្យាសាស្ត្រនិងបច្ចេកវិទ្យាសម្រាប់ការអភិវឌ្ឍប្រកបដោយគុណភាពខ្ពស់ ។
អត្ថបទបានសង្កត់ធ្ងន់ថា ពិព័រណ៍នាំចូលចិនអន្តរជាតិលើកទី ២ ស្របនឹងតម្រូវការរបស់ប្រជាជននៃបណ្តាប្រទេសនានាសម្រាប់ជីវភាពរស់នៅដ៏ល្អប្រសើរនិងជាវិធានការដ៏សំខាន់មួយសម្រាប់ប្រទេសចិនក្នុងការពង្រីកការបើកទូលាយយ៉ាងសកម្មរបស់ខ្លួន។យោងតាមផែនការដែលបានកំណត់បានបញ្ជាក់ថា ការនាំចូលទំនិញនិងសេវាកម្មរបស់ប្រទេសចិននឹងលើសពី ៣០ ទ្រីលានដុល្លារអាមេរិកនិង ១០ ទ្រីលានដុល្លារអាមេរិកដោយឡែកពីគ្នាក្នុងរយៈពេល ១៥ ឆ្នាំខាងមុខ។ដោយគ្មានការសង្ស័យ "ទីផ្សារចិន"មួយដែលកាន់តែមានភាពបើកទូលាយនិងច្នៃប្រឌិតថ្មីនឹងបង្កើតឱកាសពាណិជ្ជកម្មនិងភាគលាភកាន់តែច្រើនសម្រាប់ពិភពលោកព្រមទាំងផ្តល់នូវកម្លាំងចលករកាន់តែខ្លាំងទៅក្នុងកំណើនសេដ្ឋកិច្ចនៃពិភពលោក៕