អនុវេទិកានៃវេទិកាសេដ្ឋកិច្ចអន្តរជាតិ Hongqiao លើកទី២ក្រោមប្រធានបទស្តីពី “ ការអភិវឌ្ឍនៃប្រទេសចិនរយៈពេល៧០ឆ្នាំនិងសហគមន៍រួមវាសនានៃមនុស្សជាតិ ” បានប្រកាស«គំនិតឯកភាពរួមក្រុងសៀងហៃ»កាលពីថ្ងៃទី ៦ ខែវិច្ឆិកា ដោយបានចង្អុលបង្ហាញថា មធ្យោបាយតែមួយគត់ដើម្បីទប់ទល់នឹងបញ្ហាប្រឈមដូចជាឯកតោភាគីនិយម ការការពារនិយម និងអនុត្តរភាពនិយមជាដើម គឺការបើកទូលាយ ប្រកបដោយបរិយាប័ន្ន រួមសហប្រតិបត្តិការគ្នា និងឈ្នះ-ឈ្នះ។ ប្រទេសចិនបានលើកឡើងនូវគំនិតផ្តួចផ្តើមអំពីការរួមគ្នាកសាងសហគមន៍រួមវាសនានៃមនុស្សជាតិ និងបានផ្តល់វិភាគទានដ៏សំខាន់ក្នុងការជំរុញឱ្យគ្រប់ភាគីទាំងអស់ ដើម្បីទប់ទល់នឹងបញ្ហាប្រឈមជាសកល និងស្វែងរកនូវការអភិវឌ្ឍជានិរន្តរភាពសម្រាប់មនុស្សជាតិ។
លោក Jiri Paroubek អតីតនាយករដ្ឋមន្ត្រីឆែកបានថ្លែងថា ប្រទេសចិនទទួលបានលទ្ធផលអភិវឌ្ឍន៍ក្នុងវិស័យសេដ្ឋកិច្ចនិងសង្គមកិច្ចដ៏គួរឱ្យកោតសរសើរ។ ប៉ុន្មានឆ្នាំកន្លងមកនេះ ចិនបានចាត់វិធានការ ដើម្បីពង្រីកភាពបើកទូលាយជាបន្តបន្ទាប់ និងបានចែករំលែកនូវសក្តានុពលដ៏ធំសម្បើមនិងឱកាសកំណើននៃទីផ្សារចិនដល់សកលលោក។ ជាងនេះទៅទៀត គំនិតផ្តួចផ្តើម “ខ្សែក្រវាត់និងផ្លូវ” ក៏បានផ្តល់វិភាគទានកាន់តែខ្លាំងក្លាដល់ការអភិវឌ្ឍនៅក្នុងសកលភាវូបនីយកម្មផ្នែកសេដ្ឋកិច្ច។
សូមបញ្ជាក់ថា តំណាងមជ្ឈដ្ឋានធនាគារគំនិតនិងប្រព័ន្ធសារព័ត៌មាននៃប្រទេសនិងតំបន់ជាង ១០០ បានចូលរួមអនុវេទិកានេះ៕