ថ្ងៃទី ៥ ខែវិច្ឆិកា ថ្លែងក្នុងពិធីបើកពិព័រណ៍នាំចូលចិនអន្តរជាតិលើកទី ២ លោកស៊ី ជីនភីង ប្រធានរដ្ឋចិនបានអំពាវនាវឱ្យបណ្តាប្រទេសនានារួមគ្នាកសាងសេដ្ឋកិច្ចពិភពលោកដែលប្រកបដោយភាពបើកចំហនិងច្នៃប្រឌិតថ្មី មិនត្រូវបំបិទចំណេះដឹង ហើយក៏មិនត្រូវពង្រីកគម្លាតផ្នែកបច្ចេកវិទ្យារវាងគ្នានិងគ្នាដែរ ។
លោកស៊ី ជីនភីង បានថ្លែងថា ការអភិវឌ្ឍប្រកបដោយភាពច្នៃប្រឌិតថ្មីជាជម្រើសចាំបាច់សម្រាប់ដឹកនាំសេដ្ឋកិច្ចពិភពលោកឆ្ពោះទៅការអភិវឌ្ឍជានិរន្តរភាព ។ បច្ចុប្បន្ននេះ បដិវត្តន៍បច្ចេកវិទ្យានិងនវានុវត្តន៍ឧស្សាហកម្មជុំថ្មីកំពុងស្ថិតក្នុងខណៈពេលជាប្រវត្តិសាស្រ្តនៃការទទួលបានសមិទ្ធផលសំខាន់ៗ ។ ហេតុដូច្នេះ ប្រទេសនានាគួរតែបង្កើនការច្នៃប្រឌិតថ្មីនិងកិច្ចសហប្រតិបត្តិការ ជំរុញការរួមបញ្ចូលគ្នាខាងបច្ចេកវិទ្យានិងសេដ្ឋកិច្ចឱ្យបានស៊ីជម្រៅ បង្កើនការចែករំលែកពីសមិទ្ធផលនៃការច្នៃប្រឌិតថ្មី ខិតខំពុះពារឧបសគ្គដែលដាក់កំហិតទៅលើដំណើរច្នៃប្រឌិតថ្មី ដូចជាកត្តាចំណេះវិជ្ជា បច្ចេកវិទ្យា និងធនធានមនុស្សជាដើម និងផ្តល់ការគាំទ្រដល់សហគ្រាសក្នុងការធ្វើកិច្ចផ្លាស់ប្តូរនិងកិច្ចសហប្រតិបត្តិការផ្នែកបច្ចេកវិទ្យាដោយម្ចាស់ការ ដើម្បីធ្វើឱ្យការច្នៃប្រឌិតថ្មីមានភាពកាន់តែល្អពេញលេញ ។
លោកបានថ្លែងទៀតថា ដើម្បីអាចប្រើប្រាស់ចំណេះដឹងសម្រាប់បង្កើតសុភមង្គលនិងផលប្រយោជន៍ជូនដល់មនុស្សជាតិ គួរតែរួមគ្នាបង្កើនការការពារកម្មសិទ្ធិបញ្ហា តែមិនមែនបំបិទចំណេះដឹង ឬពង្រីកគម្លាតផ្នែកបច្ចេកវិទ្យារវាងគ្នានិងគ្នានោះឡើយ ៕
