ពិព័រណ៍នាំចូលចិនអន្តរជាតិលើកទី ២ នឹងសម្ពោធបើកនៅថ្ងៃទី ៥ ខែក្រោយ។ អ៊ីតាលីជាប្រទេសកិត្តិយសប្រចាំឆ្នាំនេះ ។ សហគ្រាសអ៊ីតាលីចំនួនជាង ១៧០ មកពីវិស័យជាច្រើនដូចជា សហគ្រាសផលិតនាវា រថយន្ត ម្ហូបអាហារ ម៉ូតជាដើមបានចុះឈ្មោះចូលរួមតាំងពិព័រណ៍។
ផ្តោតសំខាន់លើឱកាសក្នុងទីផ្សារចិន ក្រុមហ៊ុន Maserati ដែលជាម៉ាករថយន្តអ៊ីតាលីស៊េរីទំនើបបានបន្តចូលរួមពិព័រណ៍ឆ្នាំនេះ ហើយនឹងរៀបចំសាលពិព័រណ៍របស់ខ្លួនក្នុងទំហំ ២០០ ម៉ែត្រការេ ដើម្បីបង្ហាញរថយន្តស៊េរីឆ្នាំ ២០១៩ ទាំងអស់។ អ្នកគ្រប់គ្រងជាន់ខ្ពស់ក្រុមហ៊ុននេះបានថ្លែងថា បច្ចុប្បន្ននេះសេដ្ឋកិច្ចពិភពលោកប្រឈមនឹងការធ្លាក់ចុះ ប៉ុន្តែ Maserati មានទំនុកចិត្តយ៉ាងពេញទំហឹងចំពោះទីផ្សារចិន។
ម្ហូបអាហារជាលក្ខណៈតំណាងមួយនៃអ៊ីតាលី ។ តំបន់ពិព័រណ៍ម្ហូបអាហារនៃពិព័រណ៍នាំចូលចិនអន្តរជាតិគឺជាតំបន់ដែលត្រូវបានគេស្វាគមន៍យ៉ាងខ្លាំងបំផុត។ ឆ្នាំនេះ ក្រុមហ៊ុនFerrero ដែលជាអ្នកផលិតស្ករសូកូឡាដ៏ល្បីល្បាញលើសកលលោកក៏នឹងបន្តផ្សព្វផ្សាយក្នុងពិព័រណ៍នាំចូលចិនអន្តរជាតិ។
អ្នកគ្រប់គ្រងទូទៅនៃក្រុមហ៊ុន Ferrero ក្នុងទីផ្សារចិនបានប្រាប់អ្នកកាសែតថា Ferrero បានបន្តបង្កើនទុនវិនិយោគក្នុងប្រទេសចិនរយៈពេលជាង ២០ ឆ្នាំមកហើយ។ Ferrero មានការទំពឹងទុកជាច្រើនចំពោះពិព័រណ៍CIIE លើកនេះ ហើយក្រុមហ៊ុននឹងផ្សព្វផ្សាយពីផលិតផលថ្មី ក៏ដូចជាចាត់ចែងផែនការវិនិយោគនិងអភិវឌ្ឍន៍នៅចិនសម្រាប់ជំហានបន្ទាន់ដោយផ្អែកលើមតិយោបល់ដែលទទួលបានពីពិព័រណ៍CIIE នេះ៕
