«របាយការណ៍ស្តីពីបរិយាកាសពាណិជ្ជកម្មពិភពលោក 2020» បានបង្ហាញឱ្យឃើញថា ចំណាត់ថ្នាក់នៃបរិយាកាសពាណិជ្ជកម្មរបស់ចិនលើពិភពលោកបានឡើងមកដល់លេខទី ៣១ ពោលគឺបានឡើង ១៥ លំដាប់ទៀតបើប្រៀបធៀបនឹងឆ្នាំទៅមិញ ។ អ្នកជំនាញបានពន្យល់ថា នេះមានន័យថា ការធ្វើជំនួញនៅចិនមានភាពកាន់តែងាយស្រួលថែមទៀត។
សូមបញ្ជាក់ថា «របាយការណ៍ស្តីពីបរិយាកាសពាណិជ្ជកម្មពិភពលោក»បានដាក់ពិន្ទុលើតួអង្គសេដ្ឋកិច្ចចំនួន ១៩០ ទូទាំងពិភពលោក តាមរយៈសូចនាករចំនួន ១០ ដូចជាការចាប់ផ្តើមដំណើរការសហគ្រាសជាដើម។ ឆ្នាំនេះ ចំណាត់ថ្នាក់នៃសូចនាករចំនួន ៨ ប្រភេទរបស់ប្រទេសចិនបានកើនឡើង។
ចាប់តាំងពីដើមឆ្នាំ២០១៩នេះរៀងមក ស្ថាប័នមានពាក់ព័ន្ធរបស់ប្រទេសចិនបានដាក់ចេញនូវវិធានការកំណែទម្រង់ចំនួនជាង ១៣០ ហើយបានទាក់ទាញការបោះទុនវិនិយោគអន្តរជាតិកាន់តែច្រើនឡើងៗ។
កាលពីថ្ងៃទី ២៣ ខែតុលា ប្រទេសចិនបានដាក់ចេញនូវ«បទប្បញ្ញត្តិស្តីពីការធ្វើឱ្យប្រសើរឡើងនូវបរិយាកាសពាណិជ្ជកម្ម» ដោយមានកម្រិតស្មើនឹងស្តង់ដារអន្តរជាតិ ។ «បទប្បញ្ញត្តិ»នេះបានកំណត់ច្បាស់ថា នឹងបង្កើតបរិយាកាសពាណិជ្ជកម្មល្អមួយដែលមានស្ថិរភាព យុត្តិធម៌ តុល្យភាព និងអាចប៉ាន់ប្រមាណបានសម្រាប់បណ្តាតួអង្គទីផ្សារទាំងឡាយ។
លោក Yuan Dongming អនុប្រធានវិទ្យាស្ថានសិក្សាស្រាវជ្រាវសហគ្រាសនៃមជ្ឈមណ្ឌលស្រាវជ្រាវនិងអភិវឌ្ឍន៍នៃក្រុមប្រឹក្សាកិច្ចការរដ្ឋចិនបានថ្លែងថា បរិយាកាសពាណិជ្ជកម្មរបស់ប្រទេសចិននាពេលអនាគត នឹងកាន់តែល្អថែមទៀត៕
