ពិព័រណ៍នាំចូលចិនអន្តរជាតិលើកទី ២ នឹងបើកធ្វើនៅក្រុងសៀងហៃពីថ្ងៃទី ៥ ដល់ ១០ ខែវិច្ឆិកាខាងមុខ ។ ប្រទេសបារាំងជាប្រទេសកិត្តិយសមួយនៃពិព័រណ៍នាំចូលចិនអន្តជាតិលើកនេះ ។ លោក Macron ប្រធានាធិបតីបារាំងនឹងអញ្ជើញចូលរួមសកម្មភាពមានពាក់ព័ន្ធនៅក្រុងសៀងហៃ ។
តាមដំណឹងបានឱ្យដឹងថា នៅក្នុងពិព័រណ៍នាំចូលចិនអន្តរជាតិលើកដំបូង ទំហំទឹកប្រាក់ពាណិជ្ជកម្មនៃក្រុមហ៊ុនបារាំងមាន ១ ពាន់ ៥ រយ ៥០ លានដុល្លារអាមេរិក ពាក់ព័ន្ធនឹងវិស័យជាច្រើន ដូចជាកសិផល គ្រឿងឧបភោគបរិភោគ ឧស្សាហកម្ម ផលិតកម្ម និងគ្រឿងសំអាងជាដើម ។ រដ្ឋាភិបាល ក្រុមហ៊ុននិងមជ្ឈដ្ឋានសង្គមនានានៃប្រទេសបារាំងចង់ស្វែងយល់ឱ្យបានកាន់តែច្បាស់ចំពោះពិព័រណ៍នាំចូលចិនអន្តរជាតិ ។
ពេលបច្ចុប្បន្ននេះ ក្រុមហ៊ុនលំដាប់កំពូលលើពិភពលោក ដូចជាក្រុមហ៊ុន LVMH និងក្រុមហ៊ុន Kering ព្រមទាំងក្រុមហ៊ុនបារាំងចំនួន ៧៧ ដូចជាក្រុមហ៊ុន L’Oreal ក្រុមហ៊ុន Danone និង ក្រុមហ៊ុន Lesaffre ជាដើមបានបញ្ជក់ថានឹងចូលរួមពិព័រណ៍នាំចូលចិនអន្តរជាតិលើកទី ២ ។
