រដ្ឋបាលក្រុងសៀងហៃបានប្រកាសនូវបញ្ជីឈ្មោះថ្មីនៃអង្គការ/ស្ថាប័ន្ធ/សហគ្រាសដែលចូលរួមផ្តល់សេវាកម្មតាមរយៈវេទិកាសេវាកម្មពាណិជ្ជកម្មច្រកចេញចូលតែមួយ ហៅកាត់ថា “6+365” សម្រាប់ពិព័រណ៍នាំចូលចិនអន្តរជាតិ (CIIE ) កាលពីថ្ងៃទី ២២ ខែតុលា។
សូមបញ្ជាក់ថា វេទិកាសេវាកម្មពាណិជ្ជកម្មច្រកចេញចូលតែមួយ “6+365” នេះបង្កើតឡើងក្នុងបំណងជួយបង្កើតពិព័រណ៍និរន្តរភាពមួយពោលមានន័យថាទោះជាពិព័រណ៍នាំចូលចិនអន្តរជាតិបានបិទបញ្ចប់ហើយក្តី ក៏វេទិកានេះនឹងបន្តផ្តល់សេវាកម្មដល់បណ្តាសហគ្រាសលើពិភពលោក ដើម្បីជួយផ្តល់ជាមធ្យោបាយសម្រាប់ទំនាក់ទំនងចូលក្នុងទីផ្សារចិន។
វេទិកាសេវាកម្ម “6+365” នេះបានចែកជា ៤ ផ្នែកធំៗ រួមមាន ៖ មុខងារទូទៅ , ពាណិជ្ជកម្មអេឡិចត្រូនិក(E-commerce)ឆ្លងដែន , ពាណិជ្ជកម្មជំនាញវិជ្ជាជីវៈ និងមជ្ឈមណ្ឌលទំនិញ។ បន្ទាប់ពីពិព័រណ៍នាំចូលចិនអន្តរជាតិលើកដំបូងរៀងមក វេទិកាសេវាកម្ម “6+365” នេះបានជួយសហគ្រាសចំនួនជាង ៨០០ នាំទំនិញចូលរួមតាំងពិព័រណ៍ចំនួនជាង ២ ម៉ឺនចូលក្នុងទីផ្សារចិន ដែលមានតម្លៃជាង ៩០០០ លានយាន់ប្រាក់ចិន៕
គេហទំព័រផ្លូវការ៖ https://www.e-ciie.com/ (ភាសាអង់គ្លេស)
