វេទិកាផ្សព្វផ្សាយអន្តរជាតិ (ក្វាងទុង) ចិនស្តីពី “ផ្លូវសូត្រលើសមុទ្រនាសតវត្សរិ៍ទី ២១” លើកទីបីបានសម្ពោធបើកនៅទីក្រុង ជូហៃ ខេត្តក្វាងទុងប្រទេសចិនកាលពីថ្ងៃទី ២២ ខែតុលា ដែលសហការរៀបចំដោយអគ្គស្ថានីយវិទ្យុនិងទូរទស្សន៍មជ្ឈិមចិននិងរដ្ឋបាលខេត្តក្វាងទុង។ ប្រធានបទនៃវេទិកានេះគឺ « ការកសាងមហាតំបន់ឈូងសមុទ្រក្វាងទុង-ហុងកុង-ម៉ាកាវ ជំរុញធ្វើសមាហរណកម្មនៃផ្លូវសូត្រលើសមុទ្រ»។
លោក FuHua សមាជិកនៃគណៈកម្មាធិការអចិន្ត្រៃយ៍នៃមជ្ឈិមបក្សកុម្មុយនិស្តចិនប្រចាំខេត្តក្វាងទុងបានថ្លែងថា ក្វាងទុងនឹងប្រកាន់ខ្ជាប់ទស្សនៈស្តីពីសង្គមនិយមដែលមានលក្ខណៈពិសេសចិនក្នុងយុគសម័យថ្មីរបស់លោក ស៊ី ជីនភីង ដោយពួតដៃជាមួយហុងកុងនិងម៉ាកាវ ដើម្បីពង្រីកទីផ្សារតាមបណ្តោយតំបន់ “ខ្សែក្រវាត់និងផ្លូវ” ។ ក្វាងទុងនឹងចាត់ទុកការកសាងទីក្រុង សិនជិន ជាតំបន់គំរូសម្រាប់សង្គមនិយមដែលមានលក្ខណៈពិសេសចិនជាឱកាសដ៏ល្អមួយ ដើម្បីកសាងនិងផ្សព្វផ្សាយអំពីប្រទេសចិន និងមហាតំបន់ឈូងសមុទ្រក្វាងទុង-ហុងកុង-ម៉ាកាវ ។
លោក Hu Bangsheng សមាជិកនៃគណៈកម្មាធិការនិពន្ធនៃអគ្គស្ថានីយវិទ្យុនិងទូរទស្សន៍មជ្ឈិមចិនបានថែ្លងសុន្ទរកថាថា អគ្គស្ថានីយវិទ្យុនិងទូរទស្សន៍មជ្ឈិមចិននឹងបង្កើតទីស្នាក់ការទូទៅនៃមហាតំបន់ឈូងសមុទ្រក្វាងទុង ហុងកុងនិងម៉ាកាវ និងទីស្នាក់ការទូទៅនៃខេត្តក្វាងទុងនៅក្រុងក្វាងចូវ ហើយនឹងបង្កើតមជ្ឈមណ្ឌលនៃមហាតំបន់ឈូងសមុទ្រក្វាងទុង ហុងកុងនិងម៉ាកាវនៅក្រុង Shenzhen ដើម្បីធ្វើកិច្ចសហប្រតិបត្តិការយ៉ាងស៊ីជម្រៅជាមួយខេត្តក្វាងទុងក្នុងវិស័យផលិតភាពយន្តនិងកម្មវិធីទូរទស្សន៍ បច្ចេកវិទ្យា 5G នៃប្រព័ន្ធសារព័ត៌មានបែបថ្មី និងឧស្សាហកម្មផែ្នកបច្ចេកវិទ្យា HD ជាដើម។អគ្គស្ថានីយវិទ្យុនិងទូរទស្សន៍មជ្ឈិមចិនរីករាយបង្កើនកិច្ចសហប្រតិបត្តិការជាមួយប្រព័ន្ធសារព័ត៌មាននៃបណ្តាប្រទេសនានាក្នុងគ្រប់វិស័យ ដូចជាការធ្វើឱ្យប្រសើរឡើងនូវបរិយកាសនៃប្រព័ន្ធផ្សព្វផ្សាយអន្តរជាតិ ការធ្វើឱ្យស៊ីជម្រៅនូវកិច្ចសហប្រតិបត្តិការផែ្នកអត្ថរសនិងការធ្វើសមាហរណកម្មនិងការអភិវឌ្ឍប្រព័ន្ធសារព័ត៌មានជាដើម ដើម្បីរួមគ្នាចែករំលែកនូវផលប្រយោជន៍ដល់មហាតំបន់ឈូងសមុទ្រក្វាងទុង ហុងកុងនិងម៉ាកាវ និងរួមគ្នាជំរុញភាពរុងរឿងថ្កុំថ្កើងនៃផ្លូវសូត្រ។
លោក Khalil Shirgholami តំណាងស្ថានកុងស៊ុលបរទេសប្រចាំនៅក្រុងក្វាងចូវនិងជាអគ្គកុងស៊ុលអ៊ីរ៉ង់ប្រចាំនៅក្រុងក្វាងចូវបានថែ្លងសុន្ទរកថាថា លោករំពឹងថា "ផ្លូវសូត្រលើសមុទ្រក្នុងសតវត្សរ៍ទី ២១ "នឹងបង្កើននូវចំណងមិត្តភាពរវាងបណ្តាប្រទេសនានាថែមមួយកម្រិតទៀតនិងជំរុញកិច្ចសហប្រតិបត្តិការរវាងបណ្តាប្រទេសនានាដើម្បីធ្វើឱ្យពិភពលោកកាន់តែមានភាពសមាហរណកម្មនិងសន្តិភាព។
បន្ទាប់ពីពិធីសម្ពោធបើក អ្នកជំនាញការនិងបញ្ញវន្តល្បីឈ្មោះទូទាំងពិភពលោកចំនួន៦នាក់ និងអ្នកទទួលខុសត្រូវនៃប្រព័ន្ធសារព័ត៌មានបរទេសបានថ្លែងសុន្ទរកថាដោយឡែកពីគ្នា ។ លោក Angus Deaton អ្នកទទួលពានរង្វាន់ណូបែលផ្នែកសេដ្ឋកិច្ចបានថ្លែងសុន្ទរកថាក្រោមចំណងជើងថា 《ប្រទេសចិននិងប៉ែកខាងលិច៖ទ្រព្យសម្បត្តិ សុខភាពនិងវិសមភាព》 ។ លោកសម្គាល់ថា ប្រទេសចិនទទួលបានសមិទ្ធផលធំសម្បើមក្នុងការបំបាត់ចោលភាពក្រីក្រ ។ កំណើនសេដ្ឋកិច្ចបានផ្តល់នូវសុភមង្គលដល់ប្រជាជនទាំងឡាយ វាមានតម្លៃគួររៀនសូត្រតាម ។
ភ្ញៀវកិត្តិយសជាង៣០០នាក់ដូចជា តំណាងនៃស្ថានកុងស៊ុលប្រចាំនៅក្រុងក្វាងចូវនិងក្រុងមេត្រីភាពបរទេស អ្នកជំនាញការនិងបញ្ញវន្តល្បីឈ្មោះក្នុងនិងក្រៅប្រទេស អ្នកទទួលខុសត្រូវនៃសហគ្រាសល្បីឈ្មោះនិងអ្នកទទួលខុសត្រូវនៃប្រព័ន្ធសារព័ត៌មានចិននិងអន្តរជាតិជាដើមបានចូលរួមពិធីសម្ពោធបើកនៃវេទិកា ។ រសៀលថ្ងៃដដែល ក៏បានរៀបចំធ្វើអនុវេទិកាចំនួន៣ ក្រោមប្រធានបទគឺ “ការផ្សព្វផ្សាយទៅកាន់អន្តរជាតិនៃការកសាងមហាតំបន់ឈូងសមុទ្រក្វាងទុង-ហុងកុង-ម៉ាកាវ” “ការរួមបញ្ចូលនៃប្រព័ន្ធសារព័ត៌មានជួយដល់ការផ្សព្វផ្សាយនិងច្នៃប្រឌិតថ្មីអន្តរជាតិ”និង “ការកសាងរូបភាពទីក្រុងក្នុងការកសាងខ្សែក្រវាត់និងផ្លូវ”៕
