តាមស្ថិតិនៃគយចិនបានឱ្យដឹងថា ការនាំចេញនិងនាំចូលសរុបផ្នែកពាណិជ្ជកម្មជាមួយបរទេសរបស់ចិនចាប់ពីខែមករាដល់ខែកញ្ញាឆ្នាំ២០១៩នេះគឺជិត២៣ទ្រីលានយាន់ប្រាក់ចិន កើនឡើង២,៨ភាគរយបើប្រៀបធៀបនឹងរយៈពេលដូចគ្នានាឆ្នាំទៅមិញ ។
លោក Li Kuiwen អ្នកនាំពាក្យនិងជាប្រធានផ្នែកស្ថិតិនិងវិភាគនៃអគ្គនាយកដ្ឋានគយចិនបានថ្លែងនៅក្រុងប៉េកាំងថា ដំណើរនៃពាណិជ្ជកម្មជាមួយបរទេសរបស់ចិនក្នុងរយៈពេល៣ត្រីមាសឆ្នាំនេះបានលេចចេញសភាពការណ៍ដែលមានស្ថិរភាពជាទូទៅនិងលើកកម្ពស់គុណភាពដោយនឹងនរ ។ ចាប់តាំងពីឆ្នាំនេះរៀងមក កំណើនសេដ្ឋកិច្ចពិភពលោកបានធ្លាក់ចុះ ការពារនិយមខាងពាណិជ្ជកម្មបានបន្តកើនឡើង ប៉ុន្តែពាណិជ្ជកម្មបរទេសរបស់ចិននៅតែរក្សាកំណើនយ៉ាងខ្លាំងក្លាដែរ ។ តាមទិន្នន័យថ្មីបំផុតដែលប្រកាសដោយអង្គការពាណិជ្ជកម្មពិភពលោកបានឱ្យដឹងថា ពីខែមករាដល់ខែកក្កដាឆ្នាំនេះ អត្រាកំណើននៃការនាំចេញនាំចូលរបស់ចិននៅតែខ្ពស់ជាងប្រទេសអាល្លឺម៉ង់ ជប៉ុននិងកូរ៉េខាងត្បូងជាដើម ដែលឈរនៅឋានៈជាប្រទេសពាណិជ្ជកម្មទំនិញទូទាំងពិភពលោកធំទីមួយដដែល ។
