ថ្ងៃទី៧ ខែតុលា អគ្គស្ថានីយវិទ្យុនិងទូរទស្សន៍មជ្ឈិមចិនបានចេញផ្សាយបទអត្ថាធិប្បាយក្រោមចំណងជើងថា “ប្រទេសចិនបៃតងនឹងលើកកម្ពស់សោភណភាពអរិយធម៌អេកូឡូស៊ីនៅទូទាំងពិភពលោក” ។
អត្ថបទមួយនេះបានលើកឡើងថា ពីឆ្នាំ ២០០០ ដល់ឆ្នាំ ២០១៧ បរិមាណដាំដុះដើមឈើបន្ថែមរបស់ប្រទេសចិនលើសពី១ភាគ៤ នៃបរិមាណសរុបនៃការដាំដុះដើមឈើនៅលើពិភពលោក ដែលស្ថិតក្នុងលំដាប់ទីមួយលើសកលលោក ។ ប្រទេសចិនទទួលបានសមិទ្ធផលជាក់ស្តែងក្នុងការកែលម្អអេកូ-បរិស្ថាននិងសម្រេចការអភិវឌ្ឍបៃតង សមិទ្ធផលទាំងនេះមិនអាចឃ្លាតពីការគ្រោងផែនការប្រកបដោយយុទ្ធសាស្ត្រ និងការបង្កើនកម្លាំងត្រួតពិនិត្យ បង្ការនិងគ្រប់គ្រងលើវិស័យការពារបរិស្ថានពីសំណាក់រដ្ឋាភិបាលនោះទេ ហើយក៏អាស្រ័យដោយការចូលរួមជួយថែរក្សាបរិស្ថានពីសំណាក់ប្រជាជនទូទៅផងដែរ ។
អត្ថបទមួយនេះបានគូសបញ្ជាក់ថា បម្រែបម្រួលអាកាសធាតុជាបញ្ហាប្រឈមរួមរបស់មនុស្សជាតិ កិច្ចកសាងអរិយធម៌អេកូឡូស៊ីត្រូវការការចូលរួមពីពិភពលោកទាំងមូល ។ ក្នុងកិច្ចប្រជុំស្តីពីប្រតិបតិ្តការអាកាសធាតុរបស់អង្គការសហប្រជាជាតិដែលប្រារព្ធធ្វើនៅចុងខែកញ្ញាកន្លងទៅនេះ ប្រទេសចិនបានថ្លែងយ៉ាងច្បាស់ថា នឹងយកចិត្តទុកដាក់អនុវត្តនូវករណីយកិច្ចមានចែងក្នុង “អនុសញ្ញាសី្តពីបម្រែបម្រួលអាកាសធាតុក្នុងក្របខណ្ឌអង្គការសហប្រជាជាតិ ” និង “កិច្ចព្រមព្រៀងក្រុងប៉ារីស” ព្រមជាមួយគ្នានេះក៏បានគូសបញ្ជាក់ថា ការទប់ទល់នឹងបម្រែបម្រួលអាកាសធាតុត្រូវប្រកាន់ខ្ជាប់ពហុភាគីនិយម និងគោរពតាមគោលការណ៍មូលដ្ឋាន ដូចជា “រួមគ្នារ៉ាប់រងបន្ទុកដែលមានភាពខុសគ្នា ” ជាដើម ។ ប្រការនេះជាការលើកពាក្យសន្យាយ៉ាងច្បាស់ម្តងទៀតរបស់ប្រទេសចិនចំពោះសហគមន៍អន្តរជាតិក្នុងការទប់ទល់នឹងបម្រែបម្រួលអាកាសធាតុ ដោយបានអធិប្បាយពីគំនិតផ្តួចផ្តើមអំពីការអភិបាលកិច្ចបរិស្ថាននៅលើពិភពលោកទាំងមូល បានបង្ហាញពីការបេ្តជ្ញាចិត្តនិងទំនួលខុសត្រូវរបស់ប្រទេសចិនដែលជាប្រទេសធំដែលមានភាពទទួលខុសត្រូវ ។ ប្រទេសចិននឹងក្លាយជាអ្នកចូលរួម អ្នករួមចំណែកនិងអ្នកណែនាំដ៏សំខាន់ក្នុងកិច្ចកសាងអរិយធម៌អេកូឡូស៊ីនៅទូទាំងពិភពលោក ៕
