ថ្ងៃទី២៩ខែមេសា លោកស៊ីជីនភីងប្រធានរដ្ឋចិនបានជួបពិភាក្សាជាមួយសម្តេចហ៊ុនសែននាយករដ្ឋមន្រ្តីកម្ពុជានៅវិមានសភាប្រជាជនក្រុងប៉េកាំង ។
ថ្លែងក្នុងកិច្ចជំនួប លោកស៊ីជីនភីងបានលើកឡើងថា ចិននិងកម្ពុជាជាមិត្តដែកថែប។ ប្រទេសចិនយកចិត្តទុកដាក់ដល់ការអភិវឌ្ឍទំនាក់ទំនងភាពជាដៃគូសហប្រតិបត្តិការយុទ្ធសាស្រ្តគ្រប់ជ្រុងជ្រោយរវាងប្រទេសទាំងពីរ ប្រទេសចិននឹងបន្តជំហររបស់ខ្លួនដូចពេលកន្លងទៅពោលគឺគាំទ្រកម្ពុជាដើរលើផ្លូវអភិវឌ្ឍន៍ដែលសមស្របនឹងសភាពការណ៍ជាតិរបស់ខ្លួន គាំពារសិទ្ធិនិងផលប្រយោជន៍ដ៏ត្រឹមត្រូវរបស់ខ្លួន ប្រទេសចិនរីករាយរួមសហការជាមួយប្រទេសកម្ពុជា ដើម្បីពង្រឹងនិងពង្រីកចំណងមិត្តភាពប្រពៃណី ធ្វើឲ្យការប្រាស្រ័យទាក់ទងជាន់ខ្ពស់មានភាពស្អិតល្មួត ធ្វើឲ្យស៊ីជម្រៅនូវកិច្ចសហប្រតិបត្តិការជាក់ស្តែង ពង្រីកការផ្លាស់ប្តូរវប្បធម៌មនុស្សជាតិ ក៏ដូចជាជំរុញឲ្យទំនាក់ទំនងរវាងចិននិងកម្ពុជាឡើងដល់កម្រិតថ្មីថែមទៀត ។
ជាការឆ្លើយតប សម្តេចហ៊ុនសែនបានសម្តែងការសាទរចំពោះប្រទេសចិនដែលបានរៀបចំដោយជោគជ័យនូវវេទិកាកំពូលស្តីពីកិច្ចសហប្រតិបត្តិការអន្តរជាតិខ្សែក្រវាត់មួយនិងផ្លូវមួយលើកទី២ ក៏ដូចជាកោតសរសើរចំពោះភាពអស្ចារ្យនៃពិធីបើកពិរព័រណ៍សាកវប្បកម្មពិភពលោកក្រុងប៉េកាំងផងដែរ ។ សម្តេចហ៊ុនសែនបានថ្លែងថា គំនិតផ្តួចផ្តើមខ្សែក្រវាត់មួយនិងផ្លូវមួយជាគំរូនៃកិច្ចសហប្រតិបត្តិការនិងការអភិវឌ្ឍអន្តរជាតិ កម្ពុជាទទួលបានផលប្រយោជន៍យ៉ាងច្រើនពីគំនិតផ្តួចផ្តើមមួយនេះ ។ កម្ពុជារីករាយបន្តផ្តល់ការគាំទ្រគ្នាទៅវិញទៅមកជាមួយប្រទេសចិន រួមសហការគ្នាដើម្បីអនុវត្តឲ្យបានល្អនូវផែនការប្រតិបត្តិរបស់ប្រទេសទាំងពីរស្តីពីការបង្កើតសហគមន៍រួមវាសនាតែមួយ ក៏ដូចជាជំរុញកិច្ចសហប្រតិបត្តិការជាក់ស្តែងលើវិស័យពាណិជ្ជកម្មនិងវិនិយោគទ្វេភាគីជាដើមនៅក្រោមក្របខ័ណ្ឌខ្សែក្រវាត់មួយនិងផ្លូវមួយ៕