លោក ស៊ីជីនភីង ប្រធានរដ្ឋចិនជួបពិភាក្សាការងារជាមួយលោក Mahathir Mohamad នាយករដ្ឋមន្ត្រីម៉ាឡេស៊ីនៅវិមានប្រជាជនចិនកាលពីថ្ងៃទី ២៥ ខែមេសា។
ថ្លែងក្នុងកិច្ចជំនួប លោក ស៊ីជីនភីង បានចង្អុលបង្ហាញថា ប្រទេសចិននិងម៉ាឡេស៊ីគួរតែយកការរួមគ្នាកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"ជាឱកាសដើម្បីបង្កើតនូវអនាគតដ៏ល្អបរវសម្រាប់ទំនាក់ទំនងរវាងចិននិងម៉ាឡេស៊ី។ការរួមគ្នាកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"អាចជំរុញការបើកទូលាយដោយគ្រប់ជ្រុងជ្រោយនៃប្រទេសចិនដែលនាំមកនូវឱកាសកាន់តែច្រើនសម្រាប់បណ្តាប្រទេសនានាលើពិភពលោក ជាពិសេស គឺប្រទេសនៅជុំវិញ។ប្រទេសចិននិងម៉ាឡេស៊ីគួរតែបង្កើនគម្រោងផែនការ ពង្រីកវេទិកាកិច្ចសហប្រតិបត្តិការ ក៏ដូចជាលើកកម្ពស់កិច្ចសហប្រតិបត្តិការដែលមានគុណភាពខ្ពស់និងជំរុញការតភ្ជាប់និងការអភិវឌ្ឍនៃប្រទេសទាំងពីរនិងតំបន់។
ជាការឆ្លើយតប លោក Mahathir Mohamad បានថែ្លងថា ការរួមគ្នាកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"គឺជាគំនិតផ្តួចផ្តើមដ៏អស្ចារ្យមួយ វាមិនត្រឹមតែអាចដោះស្រាយបញ្ហាហេដ្ឋារចនាសម្ព័ន្ធនិងបញ្ហាដឹកជញ្ជូនដែលរារាំងដល់ការអភិវឌ្ឍនៃបណ្តាប្រទេសនានាប៉ុណ្ណោះទេ ថែមទាំងអាចដោះស្រាយអតុល្យភាពក្នុងការអភិវឌ្ឍរវាងប្រទេសនិងប្រទេស និងជំរុញកិច្ចសន្ទនានិងការផ្លាស់ប្តូរផែ្នកអរិយធម៌ទៀតផង។ភាគីម៉ាឡេស៊ីគាំទ្រគំនិតផ្តួចផ្តើម"ខ្សែក្រវាត់មួយនិងផ្លូវមួយ"។ប្រទេសម៉ាឡេស៊ីគឺជាប្រទេសមួយតាមបណ្តោយនៃផ្លូវសូត្រលើសមុទ្រ ហើយមានអាទិភាពទីតាំងពិសេស។ប្រទេសម៉ាឡេស៊ីរំពឹងថា នឹងពន្លឿនការអភិវឌ្ឍរបស់ខ្លួនតាមរយៈការរួមគ្នាកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"៕